Վարչապետ Կարեն Կարապետյանն այսօր՝ հոկտեմբերի 14-ին, ընդունել է Ռուսաստանի Դաշնության տրանսպորտի նախարար Մաքսիմ Սոկոլովին:
Հանդիպման մեկնարկին ՀՀ վարչապետը, անդրադառնալով այսօր վաղ առավոտյան Հյուսիսային Օսիայում` Բեսլան քաղաքից 6 կմ հեռավորության վրա, ոչ կանոնավոր ուղեւորափոխադրում իրականացնող Մոսկվա-Երեւան ավտոբուսի ողբերգական վթարին, նշել է, որ արդեն հանձնարարականներ է տվել համապատասխան գերատեսչությունների ղեկավարներին՝ տեղում իրավիճակը գնահատելու եւ անհրաժեշտ միջոցներ ձեռնարկելու վերաբերյալ: Վարչապետը շնորհակալություն է հայտնել ռուսական կողմին արագ արձագանքի, տեղում ցուցաբերվող աջակցության համար:
Մաքսիմ Սոկոլովը ՌԴ կառավարության անունից ցավակցություն է հայտնել Մոսկվա-Երեւան ավտոբուսի ողբերգական վթարի հետեւանքով զոհվածների ընտանիքների անդամներին ու հարազատներին եւ մանրամասներ ներկայացրել իրավիճակի եւ տեղում տարվող աշխատանքների վերաբերյալ: ՌԴ տրանսպորտի նախարարը հավաստիացրել է, որ ռուսական կողմն օպերատիվ կերպով անում է հնարավորը՝ վիրավորներին անհրաժեշտ բժշկական ու հոգեբանական օգնություն ցուցաբերելու ուղղությամբ: Նա տեղեկացրել է, որ վթարի հանգամանքները պարզելու նպատակով այնտեղ է գործուղվել նաեւ ՌԴ տրանսպորտի նախարարի տեղակալը:
Այնուհետեւ զրուցակիցները քննարկել են հայ-ռուսական հարաբերությունների ընթացքը եւ հետագա զարգացման հեռանկարները:
Կողմերը երկարաժամկետ եւ հեռանկարային են համարել գյուղատնտեսության, զբոսաշրջության, էներգետիկայի, տեղեկատվական տեխնոլոգիաների ոլորտներում, տրանսպորտային ենթակառուցվածքների եւ ներդրումային դաշտի զարգացման ուղղությամբ համագործակցության ընդլայնումը եւ ծրագրերի իրականացումը: Այս համատեքստում երկուստեք կարեւորվել է Հայ-ռուսական տնտեսական համագործակցության միջկառավարական հանձնաժողովի գործունեությունը, որի հաջորդ նիստը նախատեսվում է անցկացնել 2017 թ. Հայաստանում:
Կարեն Կարապետյանը եւ Մաքսիմ Սոկոլովը քննարկել են տարածաշրջանային նշանակություն ունեցող ենթակառուցվածքային ծրագրերին վերաբերող հարցեր, որոնք կնպաստեն տարանցիկ հաղորդակցության ուղիների վերականգնմանն ու զարգացմանը: