«Սասնա ծռեր» խմբի անդամ Վարդան Գերավետյանի հարեւանները սեփական ուժերով են վերանորոգել նրա բնակարանի դուռը: NEWS.am-ի հետ զրույցում նրա հարեւաններից Վահանը պատմեց, որ իրավապահները խուզարկության ժամանակ կոտրելով էին բացել նրա դուռը, որից հետո այն վերանորոգելու կարիք էր զգացվել:
«Նա բոլորիս համար էլ թանկ է, բոլորս էլ ուզում ենք, որ ազատ արձակվի: Ինքն այն մարդը չէ, որ ճաղերի հետեւում մնա: Նրա պայքարի շնորհիվ է, որ գերակա շահ ճանաչված մեր շենքը կա, մենք շարունակելու ենք նրա գործը եւ թույլ չենք տալու, որ քանդեն շենքը»,-ասաց նա:
Հարեւանը նշեց, որ իրենք պարբերաբար սնունդ են փոխանցում իրենց «Սասնա ծուռ» հարեւանին:
Վարդան Գերավետյանը Տերյան 23 շենքի բնակիչ է, որի բնակիչներին հարկադիր վտարում են։ Դատարանի որոշմամաբ երկամսյա ժամկետում «Սասնա ծռերի» անդամը պետք է լքեր բնակարանը։
Վարդան Գերավետյանը ամուսնացած չէ, նա բնակվում էր մենակ։
Տերյան 23, 25 եւ Լալայանց 37 շենքերի բնակիչներին իրենց բնակարաններից հարկադիր վտարվում են։ Բնակիչները ծանուցվել են, որ այլեւս իրավունք չունեն բնակարանները վաճառել, բացառությամբ «Լոկալ դեվելոփերս» ընկերության, որը տնօրինում է Սամվել Մայրապետյանը։ Վերջինը 2007-ից առ այսօր լինելով մայրաքաղաքի Տերյան 23, 25 շենքերի եւ Լալայանց 37 շենքի կառուցապատողը՝ դիմել է դատարան՝ բնակիչներին իրենց բնակարաններից հանելու համար:
Դատարանի որոշմամբ՝ երեք ընտանիք պետք է երկամսյա ժամկետում լքեն իրենց բնակարանները, որոնց մեջ է նաեւ Վարդան Գերավետյանը: Իրենց բնակարաններից զրկվելու վտանգի առաջ է կանգնած մոտ 22 ընտանիք: