Եվրամիության երկրների առաջնորդները հոկտեմբերի 20-21-ը Բրյուսելում անցկացվող գագաթնաժողովում կքննարկեն եվրոպական հետախուզությունների տվյալները, որոնց համաձայն՝ Ռուսաստանը ԵՄ երկրների ներքին քաղաքականությանը միջամտելու նպատակով գաղտնի ֆինանսավորում է Եվրոպայի ծայրահեղ աջ եւ մարգինալ կուսակցություններին: Այս մասին հաղորդում է DW-ն՝ վկայակոչելով The Financial Times-ը:
«Ակնհայտ է, որ Ռուսաստանը Եվրոպայում պոպուլիզմի աճի ոգեշնչողը չէ, սակայն պարզվել է, որ Ռուսաստանն այն ողջունում է եւ, որոշ դեպքերում, ակտիվորեն աջակցում պոպուլիստական շարժումներին եւ ծայրահեղ աջ ռուսամետ տրամադրություններով կուսակցություններին»,- ասել է Եվրոպական խորհրդի արտաքին հարցերով ավագ գիտաշխատող Ֆրեդերիկո Վեսլոն: Նրա խոսքով՝ Ռուսաստանի իշխանությունները եվրոպացի պոպուլիստներին դիտարկում են «որպես Եվրոպայում իրենց նպատակներին հասնելու օգտակար դաշնակիցներ»:
Խոսքն առաջին հերթին վերաբերում է Ռուսաստանի նկատմամբ տնտեսական պատժամիջոցների չեղարկմանը կամ Ուկրաինային Եվրոպայի աջակցության ցուցաբերումից հրաժարվելուն: