Լատվիայում ՆԱՏՕ-ի լայնածավալ զորավարժություններ են մեկնարկում: Delfi-ի հաղորդմամբ՝ նախօրեին Ռիգայում երկու օդանավ է վայրէջք կատարել, որոնք Լատվիա են հասցրել բրիտանական 400 զինվորականների: Եվս 100 բրիտանացիներ կժամանեն ծովով:
Բրիտանացիները Լատվիայի, ԱՄՆ-ի, Կանադայի, Նիդեռլանդների, Ալբանիայի, Գերմանիայի, Ռումինիայի, Իսպանիայի եւ ՆԱՏՕ-ի անդամ այլ պետությունների զինծառայողների հետ հոկտեմբերի 17-31-ը կմասնակցեն «Արծաթե նետ» միջազգային զորավարժություններին: Ընդհանուր առմամբ, վարժանքներին ավելի քան 3000 զինվորական կմասնակցի:
Զորավարժությունների ընթացքում կատարելագործվելու են Միացյալ շտաբի հրամանատարական կետերի ունակությունները ստորաբաժանումների կառավարման գործում ինչպես առօրյայում, այնպես էլ ուսումնական վարժանքների ժամանակ՝ համակարգելով դաշտային տակտիկական պարապմունքները:
«Արծաթե նետ» զորավարժություններին կմասնակցեն նաեւ պահուստայինները: Վարժանքներն անցկացնում է ցամաքային զորքերի հետեւակային բրիգադը: