ԵՄ-ից դուրս գալու որոշումից հետո Բրիտանիան կորցրել է իր տեղը ներդրումային առավել գրավիչ երկրների հնգյակում: BBC-ի փոխանցմամբ՝ այս մասին նշված է Ernst & Young քոնսալթինգային ընկերության պատրաստած զեկույցում:
Փորձագետները նշում են, որ պոտենցիալ ներդրողներին, առաջին հերթին Եվրամիության երկրների, վախեցնում են Brexit-ի հետ կապված անորոշությունները, ինչպես նաեւ աշխարհաքաղաքական մյուս փոփոխությունները, այդ թվում՝ ԱՄՆ-ի առաջիկա ընտրությունները: Ernst & Young-ի տվյալներով՝ Բրիտանիան ներկայումս համաշխարհային ներդրումային վարկանիշով յոթերորդն է, նրանից առաջ են անցնում ԱՄՆ-ը, Չինաստանը, Գերմանիան, Կանադան, Ֆրանսիան եւ Ճապոնիան:
Ընկերության նախորդ հետազոտության արդյունքներով, որոնք անցկացվել են ապրիլին, Միացյալ Թագավորությունը երկրորդ տեղում էր: «Brexit-ը աշխարհաքաղաքական փոփոխությունների վառ օրինակ է, որոնք դժվարացնում են միջազգային ներդրումները»,- նշել է EY-ի փոխնախագահ Սթիվ Քրուսքոսը:
Նրա խոսքով՝ հետագայում Բրիտանիան պետք է վերադառնա ներդրումների համար առավել գրավիչ երկրների հնգյակ, սակայն անվստահության կարճաժամկետ շրջանը նեդրողներին մտորելու ժամանակ է տալիս: