Ղարաբաղի հիմնախնդրի կարգավորման ձեւաչափում Թուրքիայի ոչ մի ներգրավվածություն չի լինի: Այս մասին հոկտեմբերի 17-ին՝ մամուլի ասուլիսի ժամանակ, հայտարարեց «Կովկաս» ինստիտուտի փոխտնօրեն, քաղաքագետ Սերգեյ Մինասյանը:
Ի պատասխան NEWS.am-ի հարցին՝ ինչո՞ւ հատկապես հիմա հնչեց ղարաբաղյան հակամարտության մեջ Թուրքիայի հնարավոր դրական դերի վերաբերյալ Ռուսաստանի ԱԳ նախարար Սերգեյ Լավրովի հայտարարությունը, Մինասյանը նշեց. «Չեմ կարծում, որ Լավրովի ասածի մեջ ինչ-որ նոր բան կար: Առաջին՝ Լավրովն ասել է, որ ղարաբաղյան հակամարտության կարգավորման հարցում գործում է ԵԱՀԿ Մինսկի խումբը, եւ Թուրքիան չի մտնում համանախագահների ձեւաչափի մեջ»: Իսկ այն հանգամանքը, շարունակեց քաղաքագետը, որը նշվել է. 2010 թվականին հայ-թուրքական կարգավորման գործընթացը սառեցվել է, քանի որ Թուրքիան փորձում էր հայ-թուրքական հարաբերությունների կարգավորումը կապել ղարաբաղյան հակամարտության հետ, նույնպես գաղտնիք չէ:
«Այո՛, հստակ է, որ Թուրքիան ղարաբաղյան հարցում առաջընթացի դեպքում հաճույքով Հայաստանի վերաբերյալ ինչ-ինչ մտադրություններ կունենա: Բայց ինչպես ինքը՝ Լավրովը, այնպես էլ մինչ այդ Ուշակովը նշել են, որ տվյալ պահին ղարաբաղյան հիմնախնդրի դիվանագիտական կարգավորման վերաբերյալ առաջխաղացում սպասելն անհնար է: Հետեւաբար՝ այդ տեսանկյունից Թուրքիայի ոչ մի ներգրավվածություն նույնպես չի լինի»,- ամփոփեց Սերգեյ Մինասյանը:
Նախօրեին Ռուսաստանի ԱԳ նախարար Սերգեյ Լավրովը կարեւոր գործոն էր համարել այն, որ Թուրքիան կարող է դրական դեակատարում ունենալ՝ ապահովելով Լեռնային Ղարաբաղի, Հայաստանի ապաշրջափակումը, տարածաշրջանում նորմալ փոխգործակցություն՝ տնտեսական, լոգիստիկ, տրանսպորտային, ենթակառուցվածքային»:
