ԵԽԽՎ-ն վերածվում է մի կառույցի, որտեղ պաշտպանում են սուլթանատի շահերը: Այս մասին, այսօր՝ հոկտեմբերի 17-ին, ԱԺ-ում լրագրողների հետ զրույցում նշել է ԵԽԽՎ-ում հայկական պատվիրակության անդամ, ԲՀԿ խմբակցության ղեկավար Նաիրա Զոհրաբյանը:
«Եթե ադրբեջանցի պատվիրակը ԵԽԽՎ-ում անհեթեթ հայտարարություն է անում, թե Հայաստանում անկախ լրագրողներին սպանում են, օրինակ բերելով իրավապաշտպան Միքայել Դանիելյանին, դա կարծում եմ՝ Հայաստանին վերաբերող հարց է: Մենք ուղղակի պարտավոր ենք անդրադառնալ Թուրքիայի եւ Ադրբեջանի խնդիրներին, քանի որ ԵԽԽՎ-ը վերածվում է մի կառույցի, որտեղ պաշտպանում են սուլթանատի շահերը»:
Նրա խոսքով, եթե որեւէ այլ պատվիրակ չի խոսում, եւ ԵԽԽՎ-ն բարձր է գնահատում սեպտեմբերի 26-ին Ադրբեջանում կայացած հանրաքվեն, որն ուղղակի ջախջախել է Վենետիկի հանձնաժողովն ու ԵԱՀԿ/ԺՀՄԻԳ-ը, մենք պարտավոր ենք անդրադառնալ ու ասել, որ նման սահմանադրությամբ ԵԽ անդամ երկիրը վերածվեց սուլթանատի: