Ընդդիմության միասնական դաշինքն անհրաժեշտ է, սակայն այդ թեմայով դեռեւս խորհրդակցություններ չեն սկսվել: Այս մասին այսօր՝ հոկտեմբերի 17-ին, խորհրդարանում լրագրողներին ասել է ՀԱԿ խմբակցության ղեկավար Լեւոն Զուրաբյանը:
Նրա խոսքով՝ ներկայումս այդպիսի խորհրդակցություններ չեն անցկացվում, բայց դրանք պետք է արդեն շուտով սկսել: ՀԱԿ-ը պատրաստ է ձգողականության բեւեռ դառնալ, որտեղ կարող են մարմնավորվել քաղաքական գործիչների, հասարակական հատվածի, նույնիսկ շարքային քաղաքացիների գաղափարները:
«Այն, որ ընդդիմությանը չհաջողվեց խոշոր քաղաքներում՝ Գյումրիում եւ Վանաձորում, տեղական ընտրություններով իշխանության գալ՝ պայմանավորված է այն հանգամանքով, որ հասարակությունը դեռեւս քաղաքային իշխանությունների ընտրությունները չի ընկալում որպես իշխանափոխության համար կարեւոր: Այդ իսկ պատճառով համախմբումն ավելի կարեւոր է խորհրդարանական ընտրություններից առաջ»,- նշել է ՀԱԿ խմբակցության ղեկավարը, որը երկրի երկրորդ եւ երրորդ քաղաքներում ընտրությունների արդյունքներով զբաղեցրել է «պատվավոր» վերջին տեղերը: