Քառօրյա պատերազմում վիրավորված ժամկետային զինծառայող Ավետիս Զարգարյանին Հնդկաստան տեղափոխելու համար դեռեւս տեխնիկական հարցերը լուծված չեն: Այս մասին NEWS.am-ի հետ զրույցում հայտնեցին Ավետիսի ծնողները:
Շուրջ մեկ ամիս է անցել նախարարության որոշումից, որ Ավետիսը պետք է հետագա բուժումը շարունակի Հնդկաստանի «Արտեմիս» վերականգնողական կենտրոնում:
«Ասում են, որ ինքնաթիռի հարցն են այժմ լուծում, որ կարողանանք Ավետիսին հանգիստ տեղափոխել Հնդկաստան, քանի որ պետք է պառկած գնա, նստել չի կարող»,- ասացին ծնողները:
Ծայրահեղ ծանր վիճակում Թալիշից Երեւան տեղափոխված եւ բազմաթիվ վիրահատությունների ենթարկված Ավետիսը սկսել է ոտքերը շարժել: Բժիշկների գնահատմամբ` նման հիվանդների համար սա պարզապես հրաշք է: Ծնողները լիահույս են, որ արտերկիր տեղափոխվելուց հետո Ավետիսի մոտ դրական տեղաշարժերն ավելի շատ կլինեն: Նշենք, որ զինծառայողի բուժման ֆինանսական միջոցները տրամադրելու է «Հայկական վիրավոր հերոսների հիմնադրամ» կազմակերպությունը:
Ավետիսը Ռուսաստանից էր եկել՝ ծառայության նպատակով, ընտանիքը Հայաստան է վերադարձել ապրիլին, Ավետիսի վիրավորվելու մասին իմանալուց հետո: Շուրջ 5 ամիս է՝ Ավետիսի ծնողներն ապրում էին բարեկամներից մեկի տանը, օրերս ստիպված բնակարան են վարձել եւ տեղափոխվել: Ինչպես են տան վարձը վճարելու, իրենք էլ չեն պատկերացնում. Ավետիսի մայրն ամբողջ օրը հիվանդանոցում է, որդուն է խնամում, իսկ հայրը դեռ աշխատանքի չի գտել: Նշենք, որ Հայաստան է վերադարձել նաեւ Ավետիսի եղբայրը, որը հաջորդ տարի պետք է ծառայության մեկնի: