Կարեւոր չէ՝ ՀԱՊԿ նոր գլխավոր քարտուղարը որ երկրից կլինի: Այս մասին այսօր՝ հոկտեմբերի 17-ին, խորհրդարանում հայտարարել է Հանրապետական խմբակցության ղեկավար Վահրամ Բաղդասարյանը:
Նա հիշեցրել է, որ ՀԱՊԿ անդամ երկրները պայմանավորվել են քվեարկությունը հետաձգել մինչեւ տարեվերջ: Բաղդասարյանի խոսքով՝ նոր գլխավոր քարտուղարի ազգային պատկանելությանը կարեւորություն չեն տալիս ո՛չ Հայաստանը, ո՛չ մյուս երկրները: Կարեւորը այդ պաշտպանական կառույցի շրջանակներում հարաբերությունների ամրապնդումն է: «Այդ պատճառով մի փորձեք ինձ հարցնել՝ արդյոք մենք թեկնածու ունենք, եւ ով է նա»,- ասել է ՀՀԿ խմբակցության ղեկավարը:
Հիշեցնենք, որ 2003 թվականից ՀԱՊԿ գլխավոր քարտուղարն է Նիկոլայ Բորդյուժան: Այդ պաշտոնը ռոտացիոն կարգով անցնում է Հայաստանին: