Ռուսաստանի ԱԳ նախարար Սերգեյ Լավրովը ղարաբաղյան հիմնախնդրում Թուրքիայի դերի վերաբերյալ բավական դիվանագիտական հայտարարություն է կատարել եւ, ըստ էության, ոչ մի նոր բան չի ասել: Այս մասին հոկտեմբերի 17-ին կայացած մամուլի ասուլիսին հայտարարել է «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը:
Նրա խոսքով՝ Լավրովն ասել է, որ եթե ղարաբաղյան հիմնախնդրում ինչ-որ բարելավում լինի, դա ազդեցություն կունենա հայ-թուրքական հարաբերությունների վրա: «Միայն թե դա անհնար է: Մենք նաեւ գիտենք, որ եթե հայ-թուրքական հարաբերություններում ինչ-որ բարելավում լինի, ապա դա ինչ-որ ձեւով կազդի ղարաբաղյան հիմնախնդրի վրա: Միայն թե այսօրվա դրությամբ դա եւս անհնար է: Եվ նա այդ մասին նույնպես ասել է. կան ԵԱՀԿ Մինսկի խմբի համանախագահներ, որոնք խնդրով զբաղվում են: Իսկ եթե Մինսկի խմբի մյուս անդամները, այդ թվում՝ նաեւ Թուրքիան եւս կարողանան օգնել, փառք Աստծո: Բավական դիվանագիտորեն է ասված: Այդ խնդրում ինչ-որ նոր բան պատկերացնելը բավական դժվար է»,- նշել է Իսկանդարյանը:
Նախօրեին Ռուսաստանի ԱԳ նախարար Սերգեյ Լավրովը կարեւոր գործոն էր համարել այն, որ Թուրքիան կարող է դրական դերակատարում ունենալ՝ ապահովելով Լեռնային Ղարաբաղի, Հայաստանի ապաշրջափակումը, տարածաշրջանում նորմալ փոխգործակցություն՝ տնտեսական, լոգիստիկ, տրանսպորտային, ենթակառուցվածքային»:
