Ընտրությունների ժամանակ 15 հազար ձայնով կրած քաղաքապետը չէր կարող իր տեղը զիջել ավելի ցածր ձայներ հավաքած ինչ-որ մեկին: Այս մասին այսօր՝ հոկտեմբերի 17-ին, Վանաձորում ասել է նախկին քաղաքապետ Սամվել Դարբինյանը՝ ներկայացնելով նորընտիր քաղաքապետ Մամիկոն Ասլանյանին:
«Պարոն Ասլանյան, նորից եմ շնորհավորում, եւ իմացեք, որ վանաձորցիներն արդարադատ են, եւ ով իր թիկունքին է, նա էլ իր տերն է, իսկ տեր լինելով ես ցանկանում եմ, որ լինեք նաեւ հարազատ ժողովրդի ծառան: Այս գաղափարով դուք ավելի հզոր կլինեք եւ ավելի լավ կղեկավարեք մեր քաղաքը»,- ասել է Սամվել Դարբինյանը:
Այնուհետեւ փոխանցիկ լանջավզնոցը, բանալին նախկին քաղաքապետը փոխանցել է Մամիկոն Ասլանյանին: Նշենք, որ Վանաձորի ավագանու երկու ուժերի անդամները բոյկոտել եւ չեն մասնակցել այսօրվա նիստին:
Նիստին ներկա էր նաեւ ՀՀ տարածքային կառավարման եւ զարգացման նախարար Դավիթ Լոքյանը, որն իր հերթին նշել է, թե Վանաձորի բրենդը մենք կորցրել ենք:
«Այն առավելությունները, որ ունեինք, որը կարելի է ասել Վանաձորի համար բրենդ է եղել, մենք կորցրել ենք: Դրա պատճառը գումաների սղությունն է, պետական օժանդակության փոքր մակարդակը, կառավարման ոչ ծրագրային ձևակերպումները, ինչի հետեւանքով մենք ունեցել ենք աղքատ, ոչ բարետես, ոչ մաքուր քաղաք»,- ասել է նա:
Նախարարը հույս է հայտնել նաեւ, որ տարբեր քաղաքական ուժեր ներկայացնող ավագանու անդամները կմիավորվեն ու կսկսեն գործել ի շահ վանաձորի ու վանաձորցու:
Հիշեցնենք, որ Վանաձորի ավագանու ԲՀԿ, «Լուսավոր Հայաստան» եւ «Հայկական վերածնունդ» խմաբցկությունների անդամները (թվով 18 հոգի) հուշագիր էին ստորագրել, որ քաղաքապետ են ընտրելու «Լուսավոր Հայաստանի» թեկնածու Քրիստ Մարուքյանին, սակայն վերջինս ստացել է 14 կողմ ձայն, փոխարենը ՀՀԿ-ի թեկնածու Մամիկոն Ասլանյանը (ՀՀԿ-ն ՀՅԴ-ի հետ միասին ուներ ավագանու 15 անդամ) ստացել է 19 կողմ ձայն եւ դարձել քաղաքապետ: