Նախագահ Սերժ Սարգսյանն այսօր ընդունել է Ռուսաստանի Դաշնության ներքին գործերի նախարար Վլադիմիր Կոլոկոլցեւին, ով Հայաստան է ժամանել Հայաստանի Հանրապետության ոստիկանության եւ Ռուսաստանի Դաշնության ներքին գործերի նախարարության միավորված կոլեգիայի17-րդ նիստին մասնակցելու նպատակով:
Երկուստեք կարեւորվել է ՀՀ եւ ՌԴ իրավապահ մարմինների միջեւ ձեւավորված սերտ համագործակցությունը, այդ համատեքստում նաեւ՝ ՀՀ ոստիկանության եւ ՌԴ ներքին գործերի նախարարության միավորված կոլեգիայի ձեւաչափով Երեւանում անցկացվող հերթական հանդիպումը:
Ընդգծելով, որ Հայաստանը կարեւոր նշանակություն է տալիս անվտանգության ապահովման եւ կազմակերպված հանցավորության տարբեր դրսեւորումներին հակազդեցության հարցերին՝ Հանրապետության Նախագահը կարեւորել է այդ ուղղությամբ ջանքերի համատեղումը, մասնագիտական պարբերական հանդիպումները: Աշխարհում օրեցօր մեծացող ահաբեկչության վտանգը, զենքի մաքսանենգությունը, թմրանյութերի ապօրինի շրջանառությունը եւ հանցավորության այլ դրսեւորումներ, ըստ Նախագահ Սարգսյանի, անվտանգությանն ուղղված լրջագույն մարտահրավերներ են, որոնց հակազդեցության նպատակով անհրաժեշտ է շարունակական փոխգործակցություն:
ՌԴ ՆԳ նախարարը շնորհակալություն է հայտնել կոլեգիայի հերթական նիստը Հայաստանում բարձր մակարդակով հյուրընկալելու համար եւ նշել, որ Հայաստանի եւ Ռուսաստանի միջեւ առկա բարձր մակարդակի քաղաքական երկխոսությունը, ռազմավարական դաշնակից երկու երկրների նախագահների միջեւ ձեռք բերված պայմանավորվածությունները պարտավորեցնում են մասնագիտական ոլորտում խորացնել համագործակցությունը՝ աշխատելով փոխվստահության եւ անկեղծ մթնոլորտում:
