Խոշոր վթար Երեւանում: Թբիլիսյան խճուղում իրար են բախվել 46 համարի երթուղու Hyundai մակնիշի ավտոբուսն ու Mercedes մակնիշի ավտոմեքենան: Բախման հետեւանքով ավտոբուսը կողաշրջվել է: Ավտոբուսում, բարեբախտաբար, ուղեւորներ չեն եղել: Ավտոբուսի վարորդը, Mercedes-ի վարորդը եւ ուղեւորը վերակենդանացման բաժանմունքում են: Նրանց վիճակը միջին ծանրության է:
Մոսկվա-Երեւան երթուղու ավտոբուսի վթարի հետեւանքով տուժածներից 4-ը Ռուսաստանում շարունակում են բուժվել: Նրանց վիճակը գնահատվում է միջին ծանրության, բոլորի մոտ դրական տեղաշարժ կա: Հայաստան տեղափոխված բոլոր տուժածները դուրս են գրվել հիվանդանոցից: Իսկ վթարի փաստով Ռուսաստանում հարուցված քրեական գործի նախաքննության շրջանակում որպես կասկածյալ հարցաքննվել է «Սկանիա» բեռնատարի վարորդը:
Հիշեցնենք, որ հոկտեմբերի 14-ի առավոտյան Վլադիկավկազ-Բեսլան շրջանցիկ ավտոճանապարհին Մոսկվա-Երեւան երթուղու «Մերսեդես» մակնիշի ավտոբուսը բախվել էր «Սկանիա» բեռնատարին: Վթարի հետեւանքով 5 մարդ է զոհվել. 2-ը Հայաստանի քաղաքացիներ էին, 3-ը՝ Ռուսաստանի:
Սերգեյ Լավրովի հայտարարությունը լայն արձագանք է գտել Հայաստանում: Ռուսաստանի արտգործնախարարը ղարաբաղյան հակամարտության կարգավորումը կապել էր հայ-թուրքական հարաբերությունների հետ: Ըստ Լավրովի՝ Թուրքիան կարող է դրական դերակատարում ունենալ՝ ապահովելով «Լեռնային Ղարաբաղի եւ Հայաստանի ապաշրջափակումը, տարածաշրջանում նորմալ փոխգործակցությունը»: Սա Հայաստանում ընկալվել է որպես ուղերձ, թե Ռուսաստանը ցանկանում է Թուրքիային ներգրավել ղարաբաղյան կարգավորման գործընթացում:
Էդուարդ Շարմազանովը հիշեցրել է, որ Թուրքիան ԵԱՀԿ Մինսկի խմբի համանախագահ երկիր չէ, համանախագահը կարող է փոխվել միայն ու միայն կոնսենսուսով, եւ հայկական կողմը երբեք չի համաձայնի դրան:
Ղարաբաղի հիմնախնդրի կարգավորման ձեւաչափում Թուրքիայի ներգրավվածությունը բացառում է նաեւ քաղաքագետ Սերգեյ Մինասյանը: Իսկ Լավրովի հայտարարության մեջ նա ոչ մի նոր բան չի տեսնում:
Ինչո՞ւ Երեւանում կայացած ՀԱՊԿ Հավաքական անվտանգության խորհրդի նիստում կազմակերպության գլխավոր քարտուղար չընտրվեց: Բորդյուժան ընտրության մասին հայտարարել էր ամիսներ առաջ, հայկական կողմն էլ թեկնածու էր առաջադրել: Այնուամենայնիվ, հարցի քննարկումը հետաձգվեց մինչեւ դեկտեմբեր: Պատճառը, քաղաքագետ Ալեքսանդր Իսկանդարյանի խոսքով, պետք է Մոսկվայում փնտրել: Նրա կարծիքով, կա՛մ այդ հարցում տարաձայնություններ կան ՀԱՊԿ երկրների միջեւ, կա՛մ հենց Մոսկվայում:
Իսկ հանրապետական Արտակ Զաքարյանը սա նորմալ է համարում: Նա չի կիսում կարծիքը, որ Ռուսաստանը չի համաձայնել հայկական կողմի ներկայացրած թեկնածուին:
Տիգրան Ուրիխանյանը պաշտոնապես հետ է վերցրել պատգամավորական մանդատից հրաժարվելու մասին դիմումը: Կառավարության հրավիրած Ազգային ժողովի նիստի մեկնարկին Գալուստ Սահակյանը հայտարարել է այդ մասին: Հայտարարությունը որոշ պատգամավորների ծափերին է արժանացել:
Հիշեցնենք. Ուրիխանյանը մանդատից հրաժարվելու դիմում ներկայացրել էր հոկտեմբերի 4-ին, իսկ հետ վերցնելու մասին հայտարարել՝ հոկտեմբերի 12-ին: Առաջին իսկ օրից, սակայն, որոշ պատգամավորներ կասկած էին հայտնել, որ նա կհրաժարվի մանդատից, իսկ հրաժարականի դիմումը պարզապես շոու էին անվանել:
Պարզվել են Արցախի դիրքերից մեկում ժամկետային զինծառայող Վահագն Վիրաբյանի սպանության մի շարք հանգամանքներ, կա կասկածյալ, նա ձերբակալված է: Քննչական կոմիտեի տվյալներով՝ մարտական դիրքում հերթապահության նշանակված շարքային Վիրաբյանի ուղղությամբ կրակահերթ է արձակել նույն զորամասի մեկ այլ շարքային զինծառայող՝ իրեն ամրակցված ինքնաձիգից։ Վիրաբյանը դեմքի եւ կրծքավանդակի շրջաններում ստացած հրազենային վնասվածքներից մահացել է: Վահագն Վիրաբյանը Եղվարդից էր, տան միակ արու զավակը: Նա շուտով զորացրվելու էր:
Հալեպում հայ է մահացել: Բերիո թեմի փոխանցմամբ՝ նա Նոր Գյուղ թաղամասի հրթիռակոծության հետեւանքով վիրավորված 35-ամյա Հարութ Ավագյանն է: Այսպիսով, սեպտեմբերի 30-ից սկսված Հալեպի հայաբնակ Նոր Գյուղ եւ Վիլլաներ թաղամասերի հրթիռակոծություններն արդեն 8 սիրիահայի կյանք են խլել, եւս 13 հայ վիրավոր է:
Իրաքի կառավարական բանակը լայնածավալ գրոհ է սկսել Մոսուլի դեմ՝ քաղաքն «Իսլամական պետության» զինյալներից ազատագրելու համար: Իրաքյան ուժերին եւ քուրդ զինյալներին աջակցում են ամերիկյան զինվորականները: Սա «Իսլամական պետության» վերջին եւ գլխավոր հենակետն է Իրաքում: Մոսուլն «Իսլամական պետության» զինյալների վերահսկողության ներքո է 2014 թվականի հունիսից: ՄԱԿ-ը զգուշացրել էր, որ քաղաքի ազատագրման գործողությունների մարդասիրական հետեւանքները կարող են առնչվել ավելի քան մեկ միլիոն մարդու: Մտավախություն կա, որ խաղաղ բնակիչները կարող են «Իսլամական պետության» զինյալների թիրախ դառնալ:
Հոկտեմբերի 17-ին դոլարն արժեզրկվել է, եվրոն ու ռուբլին՝ նույնպես: Արդյունքում դոլարի փոխարժեքը կազմել է 475 դրամ, եվրոյինը՝ 522, ռուբլունը՝ 7 դրամ 54 լումա, ֆունտինը՝ 578 դրամ։
Դիլիջանում այսօր առաջին ձյունն է տեղացել: Ձայն տեղումներ են գրանցվել նաեւ Վանաձորում: Հոկտեմբերի 18-ին հանրապետության շրջանների մեծ մասում տեղումներ են սպասվում, լեռնային գոտիներում, Լոռու, Տավուշի, Սյունիքի եւ Արցախի նախալեռնային հատվածներում՝ ձյուն: Օդի ջերմաստիճանն աստիճանաբար կնվազի 8-10, Լոռիում, Տավուշում, Սյունիքում եւ Արցախում՝ 15-20 աստիճանով: Երեւանում վաղը սպասվում է թույլ անձրեւ: