Ադրբեջանի քաղաքացիական հասարակության աշխատանքային խումբը հրապարակել է քաղբանտարկյալների միասնական ցուցակը՝ կազմված 94 մարդուց։ Նրանց թվում՝ 6 լրագրող եւ բլոգեր, 2 հրապարակախոս, 1 իրավապաշտպան, 5 երիտասարդական ակտիվիստ, կուսակցությունների 5 անդամ, 61 հավատացյալ եւ 3 ցմահ դատապարտված։
Ինչպես հայտնում է contact.az–ը, ցուցակում ընդհանուր առմամբ կա 139 անձ։ Ընդ որում, նրանցից 45-ը պոտենցիալ քաղբանտարկյալներ են համարվում եւ ընդգրկվել են «մշտադիտարկման տակ գտնվողների» բաժնում։
Աշխատանքային խումբը ընդգծել է, որ իրականում քաղբանտարկյալների թիվն ավելի մեծ է։
«Սակայն երկրում տիրող մթնոլորտը շատերին ստիպում է հեռու մնալ նրանց գործերը հրապարակայնացնելուց։ Մեկ այլ խնդիր է իրավական անիրազեկությունը, փաստաբանների պակասը։ Հատկապես վատ վիճակ է տիրում մարզերում, բացակայում են պաշտպանության իրավունքի մեխանիզմները»,– ասված է հաղորդագրության մեջ։
Ցուցակը կազմվել է ԵԽԽՎ համար 1900 բանաձեւի հիման վրա, որը սահմանում է քաղբանտարկյալների բնորոշման չափանիշները։