«Իսլամական պետություն» ահաբեկչական խմբավորման ձեռքից Մոսուլ քաղաքի ազատագրման համար Իրաքի կառավարական զորքերի եւ քրդական աշխարհազորայինների հարձակումն ընթանում է նախատեսված գրաֆիկից արագ։ Այս մասին հայտարարել է Պենտագոնի մամուլի քարտուղար Փիթեր Քուքը, փոխանցում է BBC News–ը։
«Նախնական տվյալները վկայում են, որ Իրաքի ուժերը կատարել են իրենց առաջադրանքը»,– ասել է նա։ Ընդ որում, Քուքը պարզաբանել է, որ խոսքը միայն առաջին օրվա մասին է, եւ դեռեւս վաղ է ենթադրություններ անել։
Պենտագոնի մամուլի քարտուղարը նշել է, որ արշավը լինելու է բարդ, եւ Մոսուլի ազատագրումը որոշ ժամանակ կզբաղեցնի։
Գործողության առաջին օրն արմատականներից ազատագրվել է 200 քառ/կմ տարածք։
Հիշեցնենք, որ հոկտեմբերի 17-ին մեկնարկել էր Մոսուլի ազատագրման գործողությունը։ Ցամաքային գործողություններին նախորդել էին ԱՄՆ ղեկավարած կոալիցիայի հրետանային եւ օդային հարվածները։