Ընդդիմությունը որոշել էր իշխանության հետ ոտք մեկնել ընտրական տակտիկական հնարքներում եւ բոլորովին սպասելի պարտվեց։ Այս մասին հոկտեմբերի 18-ին ԱԺ–ում ասել է ՀՅԴ խմբակցության ղեկավար Արմեն Ռուստամյանը՝ ելույթ ունենալով Ընտրական օրենսգրքի նախագծի քննարկումներին։
Նրա խոսքով՝ եթե գործնականում ինչ–որ տեղ անազնիվ են քվեարկում կամ հաշվում, պետք չէ դրանում մեղադրել Ընտրական օրենսգիրքը։ Եթե ընդդիմադիր կուսակցությունն ի վիճակի չէ բոլոր տեղամասերում վստահված անձինք ապահովել, ապա ընտրական հանձնաժողովի անդամները կարող են ցանկացած խախտում թույլ տալ։ Եվ այստեղ պետք չէ մեղադրել օրենքը։ «Բոլորը դեմ էին ԸՕ բարեփոխումներին։ Իսկ հիմա մենք Հայաստանի պատմության մեջ առաջին անգամ ունենք այնպիսի իրավիճակ, երբ ավագանու ընդդիմադիր խմբակցությունները կարող են միավորվել եւ իշխանություն ձեւավորել։ Իսկ առաջ ինչպե՞ս էր։ Ով շատ ձայն էր հավաքում, եթե անգամ այդ շատը 1 տոկոսով էր, նա էլ քաղաքապետ էր դառնում։ Իսկ մենք բարեփոխումներ ենք առաջարկել, որոնց շնորհիվ ընդդիմությունը կարող է մեծամասնություն ձեւավորել։ Հենց այդ պատճառով մենք դեմ ենք առաջին տեղը զբաղեցնող ուժին բոնուսներ տալուն։ Հակառակ դեպքում կլինի նույնը, ինչ որ առաջ, եւ ինչ որ տեղի ունեցավ Գյումրիի ընտրություններում»,– ասել է Ռուստամյանը։
Ռուստամյանը բացատրելի է համարում այն, որ ավագանու մի քանի անդամ Վանաձորի քաղաքապետի ընտրություններում դավաճանել են այն կուսակցություններին, որոնցից ընտրվել են։ «Այդ մարդիկ կուսակցություն էին բերել իրենց ընտրազանգվածը, քանի որ տեղերում հաճախ քվեարկում են ոչ այնքան կուսակցության համար, որքան կոնկրետ մարդկանց։ Պետք է իմանալ, որ կան այդպիսի տրոյական ձիեր, եւ մտածել, թե պետք է արդյոք նրանց ընդգրկել ցուցակներում, թե ոչ։ Իսկ նրանք որոշեցին վերցնել եւ իշխանության հետ ոտք մեկնել ընտրական տակտիկական հնարքներում։ Եվ պարտվեցին»,– ասել է ՀՅԴ խմբակցության ղեկավարը։
