Հայաստանը միշտ խոցելի վիճակում է, քանի որ Թուրքիան եւ Ռուսաստանը լավ եւ եղբայրական հարաբերություններ ունեն: Այս մասին այսօր՝ հոկտեմբերի 18-ին, մամուլի ասուլիսին հայտարարել է «Ժառանգություն» կուսակցության պատգամավոր Զարուհի Փոստանջյանը:
Անդրադառնալով Ռուսաստանի ԱԳ նախարար Սերգեյ Լավրովի վերջին հայտարարությանը՝ ղարաբաղյան հիմնախնդրում Թուրքիայի դերի մասին, Փոստանջյանն ասել է. «Երբ խոսքը Ռուսաստանի շահերի մասին է, ապա հայ ժողովրդի շահերը միանշանակ զոհաբերվում են: Եվ տվյալ պահին մենք դրա ականատեսն ենք դառնում: Որո՞նք պետք է լինեն մեր քայլերը: Մենք պարտադիր պետք է գրանցեինք մեր իրավունքները, սակայն դա չարեցինք, քանի որ այս 25 տարիներին իներցիայով են ընթացել»:
Պատմական էքսկուրսիա կատարելով՝ արեւմտամետ պատգամավորը հասել է մինչեւ Սեւրի պայմանագիր՝ այն համարելով ինչպես տարածաշրջանային խնդիրների լուծում, այնպես էլ Մերձավոր Արեւելքի նոր քարտեզի ձեւավորման հիմք: Սակայն ինչպես կարելի է հասնել բոլորի կողմից մոռացված պայմանագրի իրականացմանը՝ նա չի հստակեցրել: «Քառօրյա պատերազմից հետո մենք պետք է նոր, մաքուր էջից սկսեինք: Բայց նախկին քաղաքականությունն ենք վարում: Պարզապես անթույլատրելի է խոսել Լեռնային Ղարաբաղի ինքնավար մարզի տարածքի ճանաչման դիմաց ինչ-որ զիջումների մասին, հատկապես չորսօրյա պատերազմից հետո»,- ընդգծել է Զարուհի Փոստանջյանը: