Հայաստանի եւ Հունաստանի համալսարաններում հունագիտական եւ հայագիտական կենտրոններ կբացվեն: Այս մասին նշվել է այսօր՝ հոկտեմբերի 18-ին, ՀՀ կրթության եւ գիտության նախարար Լեւոն Մկրտչյանի եւ ՀՀ-ում Հունաստանի դեսպան Նաֆսիկա-Նենսի Էվա Վրայլայի հանդիպման ժամանակ:
ԿԳՆ-ից NEWS.am-ին հայտնում են, որ շնորհավորելով նորանշանակ դեսպանին մեր երկրում դիվանագիտական առաքելություն սկսելու կապակցությամբ` նախարար Լեւոն Մկրտչյանը համոզմունք է հայտնել, որ կրթության բնագավառում Հունաստանի հետ մեր հարաբերությունները զարգացման նոր մակարդակ կարձանագրեն եւ այդ համատեքստում` կարեւորել է համագործակցության զարգացմանն ու խորացմանն ուղղված գործնական քայլերի իրականացումը:
Շնորհակալություն հայտնելով ոլորտում առկա համագործակցության առնչությամբ` դեսպան Էվա Վրայլան կարեւորել է մեր երկու բարեկամ պետությունների հարաբերությունների դինամիկ զարգացման գործում կրթության դերը:
Հանդիպման հիմնական առանցքում եղել է Հայաստանի եւ Հունաստանի կառավարությունների միջեւ 2016-2020թթ. կրթության եւ հետազոտությունների բնագավառում համագործակցության մասին ծրագիրը, որի վերաբերյալ փաստաթուղթը ստորագրվել է այս տարվա մարտին Հունաստանում: Համաձայն ծրագրի, համատեղ կրթական ծրագրեր իրականացնելու նպատակով, նախատեսվում է ակտիվացնել բարձրագույն եւ հետազոտական հաստատությունների միջեւ հետագա համագործակցությունը, իրականացնել կրթաթոշակների փոխանակում: Հայաստանում հունարենի եւ հունական մշակույթի, իսկ Հունաստանում հայոց լեզվի եւ մշակույթի տարածման ու զարգացման նպատակով նախատեսվում է համալսարաններում հիմնադրել համապատասխանաբար` հունագիտական եւ հայագիտական կենտրոններ:
Կողմերի հավաստմամբ` ծրագրի իրականացումը նոր թափ կհաղորդի կրթության ոլորտում երկու երկրների միջեւ համագործակցության ամրապնդմանը եւ զարգացմանը: Միաժամանակ, պատրաստակամություն է արտահայտվել ձեռնարկել անհրաժեշտ քայլեր ՀՀ Ազգային Ժողովի կողմից նշված փաստաթղթի վավերացումը, հնարավոր սեղմ ժամկետումներում, ապահովելու համար: