Երեւանում հոկտեմբերի 18-ին տեղի է ունեցել եվրաակումբի պաշտոնական բացումը:
Հայաստանում Եվրամիության գրասենյակի ղեկավար, դեսպան Պյոտր Սվիտալսկու խոսքով՝ եվրաակումբների գաղափարը 25 տարի առաջ մեկնարկել է Պորտուգալիայում:
«Այդ գաղափարը տարածվել է ԵՄ անդամ մյուս երկրներում, նաեւ ԵՄ սահմաններից է դուրս եկել: Ես շատ ուրախ եմ, որ Հայաստանում երիտասարդները հետաքրքրված են այս գաղափարով եւ նախաձեռնությամբ: Այն փաստը, որ այդ նախաձեռնությունները տարածվում են նաեւ Հայաստանում՝ միանգամայն խորհրդանշական է: Դա վկայում է, որ հայ երիտասարդների եվրոպական ինքնությունը շատ ուժեղ է: Դա նշանակում է, որ Հայաստանի երիտասարդությունը անչափ շահագրգռված է եվրոպացի երիտասարդների հետ կապերի եւ շփումների պահպանմամբ՝ երկխոսություն եւ համագործակցություն իրականացնելու նպատակով, եւ՝ ոչ միայն Եվրամիության շրջանակում»,- նշել է ԵՄ պատվիրակության ղեկավարը:
Նրա խոսքով՝ եվրաակումբների գաղափարը շատ պարզ է: «Դա հնարավորությունների ստեղծում է, մասնավորապես՝ երիտասարդների համար, հասանելիություն Եվրոպայի եւ եվրոպական արժեքների վերաբերյալ տեղեկատվությանը: Մենք հավատում ենք, որ եվրաակումբների օգնությամբ Հայաստանի երիտասարդությունը, հատկապես մարզերի, լրացուցիչ տեղեկություններ կստանա Եվրամիության կողմից երկրում իրականացվող ծրագրերի մասին»,- ընդգծել է Պյոտր Սվիտալսկին:
Հայաստանում առաջին եվրաակումբը բացվել է Գորիսում: «Այժմ մենք Հայաստանի կենտրոնում՝ Երեւանում բացում ենք երկրորդ եվրաակումբը»,- եզրափակել է նա:
