ՀՀ ոստիկանությունը հնարավորության դեպքում կանխում է Ադրբեջանում գրանցված կեղծ հայկական կայքերի աշխատանքը։ Այս մասին հոկտեմբերի 18-ին խորհրդարանում ասել է փոխոստիկանապետ Վարդան Եղիազարյանը՝ ներկայացնելով «Տեղեկատվական ոլորտում հանցավոր գործունեությանը հակազդման հարցերով Հավաքական անվտանգության մասին պայմանագրի կազմակերպության անդամ պետությունների փոխգործակցության մասին» արձանագրությունը։
Նրա խոսքով՝ Ադրբեջանի դոմեն տարածքում ՀՀ իշխանություններն ուղիղ ազդեցության հնարավորություն չունեն։ Բայց այդ կայքերի հարցը պարբերաբար բարձրացվում է համապատասխան միջազգային կազմակերպություններում։ «Հասկանալի պատճառներով մենք բախվում ենք տեխնիկական եւ քաղաքական դժվարությունների, սակայն աշխատանք տանում ենք»,– ասել է փոխոստիկանապետը։