Իրաքի Մոսուլ քաղաքի ազատագրման գործողության ընթացքում սպառնալիքի տակ կարող է հայտնվել քաղաքի բնակիչների անվտանգությունը: «Իսլամական պետության» գրոհայինները կարող են նրանց որպես կենդանի վահան օգտագործել: Այս մասին հայտարարել է ՄԱԿ գլխավոր քարտուղարի հումանիտար հարցերով տեղակալ Սթիվեն Օ՛Բրայենը:
Նա ընդգծել է, որ հազարավոր քաղաքացիներ կարող են արտաքսվել Մոսուլից կամ հայտնվել կրակի գծի արանքում: Առավել խոցելի են կանայք, երեխաները, ծերերը եւ հաշմանդամները: Մարտերի ինտենսիվությունից եւ չափերից կախված՝ վատագույն սցենարի դեպքում մոտ մեկ միլիոն մարդիկ, հնարավոր է, հարկադրված լինեն լքել իրենց տները: ՄԱԿ գլխավոր քարտուղարի տեղակալը հակամարտության բոլոր կողմերին կրկին կոչ է արել հետեւել միջազգային իրավունքի ոլորտում իրենց պարտավորություններին՝ պաշտպանել խաղաղ բնակիչներին եւ ապահովել նրանց հասանելիությունը անհրաժեշտ օգնությանը: Նա ընդգծել է, որ դա ամենակարեւոր խնդիրն է:
Այժմ արդեն ճամբարներ են պատրաստվել 60 հազար մարդու ապաստանելու համար: Գլխավոր քարտուղարի տեղակալի խոսքով՝ 250 հազար մարդու համար լրացուցիչ ապաստարանների շինարարություն է իրականացվում: