ԵՄ Հարավային Կովկասի ու Վրաստանի հարցերով հատուկ ներկայացուցիչ Հերբերտ Զալբերգը այս շաբաթ Հայաստան կժամանի։ Այս մասին հոկտեմբերի 18-ին հայտնել է Հայաստանում ԵՄ պատվիրակության ղեկավար, դեսպան Պիոտր Սվիտալսկին Երեւանում «Եվրաակումբի» բացման արարողության ժամանակ։
Նրա խոսքով, իր մանդատի բաղկացուցիչներից մեկը Հայաստում ու Ադրբեջանում մարդկանց միջեւ շփումների հաստատումն ու վստահության մթնոլորտի ձեւավորումն է։ «ԵՄ-ն ֆինանսավորում է Հայաստանի ու Ադրբեջանի ժողովուրդների միջեւ վստահության ձեւավորմանը նպաստող ծրագրերը։ Ես գիտեմ, որ դեսպան Զալբերը նույնպես փնտրում է այդ ծրագրերին նպաստելու հնարավորություններ»,- նշել է Սվիտալսկին։
NEWS.am –ի թղթակցի հետ զրույցում Հերբերտ Զալբերի մամուլի քարտուղար Հենրի Դյուկենը հայտնել է, որ ԵՄ Հարավային Կովկասի ու Վրաստանի հարցերով հատուկ ներկայացուցիչ, դեսպան Հերբերտ Զալբերը այս շաբաթվա վերջին պաշտոնական այցով Հայաստան կժամանի։ «Այս շաբաթվա վերջին նա կլինի Երեւանում, իսկ հաջորդ շաբաթ կայցելի Բաքու։ Դեսպան Զալբերը Հայաստանի ու Ադրբեջանի ղեկավարության հետ բարձր մակարդակի վրա խորհրդակցություններ կանցկացնի Լեռնային Ղարաբաղի խնդրի խաղաղ կարգավորման ու փոխադարձ հետաքրքրություն ներկայացնող այլ հարցերի շուրջ»,- նշել է Հենրի Դյուկենը։