Հայաստանի եւ Լիբանանի միջեւ գյուղատնտեսության ոլորտում ձեւավորվել են սերտ հարաբերություններ: Այս մասին, այսօր՝ հոկտեմբերի 19-ին, Հայաստանում Լիբանանի Հանրապետության արտակարգ եւ լիազոր դեսպան Ժան Մաքարոնիի հետ հանդիպման ժամանակ նշել է ՀՀ գյուղատնտեսության նախարար Իգնատի Առաքելյանը:
Գյուղնախարարությունից NEWS.am-ին հայտնում են, որ հանդիպման սկզբում դեսպանը շնորհավորել է Իգնատի Առաքելյանին ՀՀ գյուղատնտեսության նախարարի պաշտոնում նշանակվելու առթիվ եւ մաղթել արդյունավետ աշխատանք:
«Ես տեղյակ եմ, որ Հայաստանի եւ Լիբանանի միջեւ գյուղատնտեսության ոլորտում ձեւավորվել են սերտ հարաբերություններ, Լիբանանի դեսպանատունը ձեռնարկում է մեր երկրի գյուղատնտեսության ոլորտի զարգացմանն ուղղված նախաձեռնություններ, լիբանանցի գործարարները շահագրգռված են Հայաստանում ներդրումներ իրականացնելու գործում: Կցանկանայի շեշտել, որ մենք պատրաստ ենք լիբանանյան կողմի հետ համագործակցել տարբեր ուղղություններով եւ քննարկման առարկա դարձնել ներկայացվող առաջարկները», – ողջունելով հյուրին` նշել է նախարար Իգնատի Առաքելյանը:
Որպես համագործակցության հնարավոր ուղղություն` նախարարն առաջարկել է ուսումնասիրել համատեղ ձեռնարկությունների ստեղծման հնարավորությունը:
Դեսպան Ժան Մաքարոնն իր հերթին համառոտ ներկայացրել է լիբանանյան գործարարների կատարած ներդրումները Հայաստանի գյուղատնտեսության ոլորտում` հատկապես կարեւորելով «Գարդենիա Լեբանիզ Ֆարմս» ընկերության գործունեությունը, որի ջանքերով 2015 թվականի մայիսին Կոտայքի մարզի Եղվարդ համայնքում հիմնվել են «պեկան» տեսակի ընկուզենու այգիներ:
Հյուրը նաեւ տեղեկացրել է, որ լիբանանցի գործարարները ներկայումս մեծապես հետաքրքրված են ներդրումներ իրականացնել Հայաստանի գյուղատնտեսության ոլորտի տարբեր ճյուղերում, մասնավորապես` կարտոֆիլի վերամշակման ոլորտում:
Հանդիպման ավարտին նախարարը եւս մեկ անգամ պատրաստակամություն է հայտնել աջակցություն ցուցաբերել գյուղատնտեսության ոլորտում հայ-լիբանանյան համագործակցության ընդլայնման եւ նոր գործարար կապերի հաստատման հարցում:
