Ընտրական օրենսգրքի նախագծում ընտրակեղծիքի մասին «ակնհայտ սուտ մատնության» դիսպոզիցիայի ձևակերպման շուրջ համաձայնությունը դեռ չի կայացել: Այս մասին, այսօր՝ հոկտեմբերի 19-ին, ԱԺ Պետաիրավական հարցերի մշտական հանձնաժողովի նախագահ Հովհաննես Սահակյանի աշխատասենյակում խմբակցությունների ղեկավարների մասնակցությամբ ԸՕ շուրջ քննարկումից հետո լրագրողներին հայտնել է ՀԱԿ խմբակցության ղեկավար Լևոն Զուրաբյանը:
«Դեռ համաձայնության չենք եկել, քննարկում ենք: Այն խնդիրը, որի մասին վարման կարգով խոսեց Գագիկ Ջհանգիրյանը դեռ լուծված չէ, բանակցությունները շարունակվում են, հուսով եմ՝ կգանք ընդհանուրի, այս պահին կենտրոնացած ենք խնդրի լուծման վրա»,-ասաց Զուրաբյանը:
Հիշեցնենք, որ այսօր՝ հոկտեմբերի 19-ին Ընտրական օրենսգրքի փոփոխություններն առաջին ընթերցմամբ ընդունվեց 104 կողմ, 4 դեմ եւ 1 ձեռնպահ ձայների հարաբերակցությամբ:
ՀԱԿ խմբակցության պատգամավոր Գագիկ Ջհանգիրյանը բարձրացրել էր այն հարցը, որը մտահոգում է ընդդիմադիրներին. «Խնդիրը հետեւյալն է. ոչ թե դեմ ենք ձեռք բերված համաձայնությանը եւ դրա տեքստին, այլ դրա արտացոլմանը, մասնավորապես, քրեական օրենսգրքի 154-րդ հոդվածի դիսպոզիցիային, որը տվյալ խմբագրությամբ քրեական պատասխանատվություն է նախատեսում նաեւ անզգույշ մեղքով ընտրական հանձնաժողովին դիմելու համար, եթե քաղաքացին բավարար հնարավորություն չի ունեցել ստուգելու: Այսինքն մենք սուտ ցուցմունք տալու նույն նորմը կիրառում ենք ավելի պարզեցված եւ անզգույշ մեղքի պայմաններում, ինչն անընդունելի է»:
Նույն տեսակետն են արտահայտել նաեւ ԲՀԿ խմբակցության ղեկավար Նաիրա Զոհրաբյանը՝ նշելով. «Մենք միտում ենք տեսնում ձեռքբերված համաձայնությունը տապալելու: Կառավարության ներկայացուցիչը, դիտավորությամբ կամ միտումնավոր կերպով, չի ցանկանում «սուտ» բառը ավելացնել նախագծում: Մեր քննարկումները այս պահին կարծես որեւէ հանգուցալուծման չեկան: Համաձայնությունը չեղարկելը նշանակելու է, որ մենք զրկվելու ենք ընտրացուցակները հրապարակելու կարեւոր պահանջից, որը ընդդիմության երկար տարիների պահանջն է եղել: Չեղարկվելու է նաեւ ընտրատեղամասերում նկարահանելը, նաեւ ուրիշի փոխարեն քվեարկելու համար պատասխանատվությունը: ԲՀԿ-ն առաջին ընթերցմամբ քվեարկում է կողմ, որովհետեւ մեզ ՀՀԿ խմբակցության ղեկավարը խոստացել է, որ քննարկումները կշարունակվեն, եթե չեկանք համաձայնության երկրորդ ընթերցմամբ քվեարկությանը չենք մասնակցելու»: