Չարիքը, որ ուրվականները գերեզմաններից, արտերկրից գալիս քվեարկում էին, այսօր վերացրեցինք։ Այս մասին այսօր՝ հոկտեմբերի 19-ին, Ազգային ժողովում լրագրողների հետ զրույցում ասել է Լեւոն Զուրաբյանն՝ անդրադառնալով Ընտրական օրենգրքի «սուտ մատնության» դրույթի փոփոխության շուրջ ձեռք բերված համաձայնությանը։
«Քվեարկված ցուցակների հրապարակման համար հայ հասարակությունը, քաղաքացիական հասարակությունն ու ընդդիմադիր ուժերը պայքարում են 15 տարի շարունակ եւ դա համարվել է չլուծվող հարց: Ես կարծում եմ՝ երբ որ նման չլուծվող հարցը լուծվում է, այդ կապակցությամբ պետք է շնորհավորել բոլոր այն մարդկանց, որոնք ուզում են Հայաստանում կառուցել ժողովրդավարություն»,-ասաց ընդդիմադիր գործիչը։
Ամեն դեպքում, ՀԱԿ պատգամավորը նշել է, որ չնայած այս փոփոխություններին, իրենց սրտով չէ նոր Ընտրական օրենսգիրքը։ «Ընտրական օրենսգրքի շուրջ մենք նույն համաձայնագրում գրել ենք, որ կոնսենսուս չունենք: Մասնավորապես վարկանիշային տարածքային ցուցակների համակարգը բացարձակապես մերժում ենք: Մենք Ընտրական օրենսգիրքը չենք համարում լավը, համարում ենք, որ այնտեղ կան բազմաթիվ չլուծված խնդիրներ, որոնք ռեժիմին հնարավարություն են տալիս չարաշահելու ադմինիստրատիվ ռեսուրսը։ Խոսքը նրա մասին է, որ այն ոսկե պաշարը՝ 500 հազար ձայնի, որը որպես վերջին հնարավորություն էր օգտագործում իշխանությունը, երբ ձայնի խնդիր էր ունենում, այդ պաշարից ազատվում ենք։ Քվեարկությունը լինելու է միայն ՀՀ-ում գտնվող ողջ ընտրողների կողմից»,-ասաց Կոնգրեսի ներկայացուցիչն ընդգծելով, որ իրենք բացել են դեպի ժողովրդավարության հաղթանակ տանող դուռը։
Հիշեցնենք, որ այսօր՝ հոկտեմբերի 19-ին Ընտրական օրենսգրքի փոփոխություններն առաջին ընթերցմամբ ընդունվեց 104 կողմ, 4 դեմ եւ 1 ձեռնպահ ձայների հարաբերակցությամբ:
ՀԱԿ խմբակցության պատգամավոր Գագիկ Ջհանգիրյանը բարձրացրել էր այն հարցը, որը մտահոգում է ընդդիմադիրներին. «Խնդիրը հետեւյալն է. ոչ թե դեմ ենք ձեռք բերված համաձայնությանը եւ դրա տեքստին, այլ դրա արտացոլմանը, մասնավորապես, քրեական օրենսգրքի 154-րդ հոդվածի դիսպոզիցիային, որը տվյալ խմբագրությամբ քրեական պատասխանատվություն է նախատեսում նաեւ անզգույշ մեղքով ընտրական հանձնաժողովին դիմելու համար, եթե քաղաքացին բավարար հնարավորություն չի ունեցել ստուգելու: Այսինքն մենք սուտ ցուցմունք տալու նույն նորմը կիրառում ենք ավելի պարզեցված եւ անզգույշ մեղքի պայմաններում, ինչն անընդունելի է»:
Նույն տեսակետն են արտահայտել նաեւ ԲՀԿ խմբակցության ղեկավար Նաիրա Զոհրաբյանը:
