Ամեն ինչ անում ենք, որ ոչ կանոնավոր ուղեւորափոխադրումների մասին օրինագիծն ինչքան հնարավոր է շուտ ընդունվի Ազգային ժողովի կողմից: Այս մասին այսօր` հոկտեմբերի 19-ին, լրագրողների հետ հանդիպմանն ասաց Տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը:
Ոչ կանոնավոր ուղեւորափոխադրումները կարգավորելու մասին նախարարությունը հիշեց միայն Տուլայում անցած տարի տեղի ունեցած ողբերգական վթարից հետո: 10 ամսվա ընթացքում նախագիծը մշակվեց, ուղարկվեց Ազգային ժողով, առաջին ընթերցումն անցավ:
«Ազգային ժողովն իր պրոցեդուրաներն ունի և կանցնի, և բնական է` մենք կփորձենք ավելի արագացնել: Միայն օրենքի նախագծով հարցը չի լուծվում, պետք է խնդրին ամբողջական մոտեցում ցույց տալ, հասարակության մասնակցությունն էլ պետք է լինի»,- ասաց նախարարը:
Փոխնախարար Արամ Արսենյանն էլ հավելեց, որ նախարարությունը քայլեր է ձեռնարկում, որ ոչ կանոնավոր ուղևորափոխադրումներ իրականացնելիս օրենքում փոփոխություններն իրականացվեն, որը հնարավորություն կտա բացառել ոչ կանոնավոր ուղեւորափոխադրումների անվան տակ կանոնավոր ուղեւորափոխադրումներ իրականացնելը:
«Տոմսերի վաճառքի վրա վերահսկողությունն ավելի շատ պետք է լինի, ոչ կանոնավոր ուղևորափոխադրումը պետք է կատարվի պատվերով, պայմանագրի առկայության դեպքում, ուղևորների անվանացանկը ևս պետք վերահսկվի: Ոչ կանոնավորի և կանոնավորի միջև տարբերություն պետք է լինի»,- ասաց փոխնախարարը:
Անդրադառնալով փոխհատուցմանը` Վահան Մարտիրոսյանը նշեց, որ Մոսկվա-Երեւան ավտոբուսի վթարից հետո փոխհատուցում չի լինելու, քանի որ կանոնավոր ուղեւորափոխադրում չէր, սակայն դրամական օգնություն կտրամադրվի` որպես բարի կամքի դրսեւորում: Այնուամենայնիվ, նախարարությունը պատրաստվում է այնպիսի փոփոխություններ մտցնել օրենքում, որը հնարավորություն կտա կատարելու ուղեւորի ապահովագրություն: