Arloopa ընկերության Roller Coaster VR խաղը, հոկտեմբերի 18-ից հասանելի է Oculus Store-ում: Այս մասին NEWS.am–ի թղթակցին տեղեկացրեց ընկերության համահիմնադիր եւ տնօրեն Արման Աթոյանը:
Մի քանի ամիս առաջ թողարկված խաղն Google Play- ում արդեն ունի 100 000-ից ավելի ներբեռնում, իսկ թողարկումից մեկ ամիս հետո դիմել էր Oculus Store-ի խաղացանկում ներառվելու համար:
« Մի քանի փուլ անցանք՝ Oculus Store- ում ներառվելու համար: Այս հարթակում շատ բարձր որակական հատկանիշներ ունեցող խաղերն են ներառվում, պահանջներն իրոք շատ խիստ են: Սակայն որոշակի շտկումներ եւ որակական բարեփոխումներ անելուց հետո, վերջապես հաստատվեց Roller Coaster-ի հասանելիությունը Oculus Store-ում»,- ասաց Արման Աթոյանը:
Arloopa ընկերությունը այս օրերին մասնակցում է նաեւ Բեռլինում լրացված իրականության (AR) AWE EUROPE 2016 խոշոր ցուցահանդեսին՝ ներկայացնելով սեփական AR լուծումները: