Սյունիքի մարզպետ Սուրիկ Խաչատրյանի դեմ մահափորձի գործով արդեն նախկին մեղադրյալ Արա Բուդաղյանը, որը գրեթե մեկ տարի անցկացրել է անազատության մեջ, դեռ չի որոշել` կդիմի ներպետական ատյաններին, թե ոչ: Այս մասին NEWS.am-ի թղթակցի հետ զրույցում ասաց Բուդաղյանի պաշտպան Հայկ Ալումյանը:
Փաստաբանի խոսքով` իրենք դեռ բավականին ժամանակ ունեն` որոշելու, թե կոնկրետ ինչ բողոք կներկայացնեն, եթե դիմեն:
Նշենք, որ Արա Բուդաղյանը 11 ամիս անցկացրել է կալանավայրում: Նրա նկատմամբ քրեական հետապնդումը դադարեցվել է այս տարվա հունիսի 10-ին:
Ավելի վաղ հայտնել էինք, որ Սյունիքի մարզպետ Սուրիկ Խաչատրյանի եւ նրա ուղեկիցների նկատմամբ 2015թ. մայիսի 20-ին հրազենի գործադրմամբ սպանության փորձ կատարելու դեպքի առթիվ իրականացվող նախաքննության ընթացքում ՀՀ ԱԱԾ մարմինների կողմից ձեռնարկված օպերատիվ-քննչական գործողությունների արդյունքում, նշված հանցագործությանն առնչակից լինելու կասկածանքով, հուլիսի 3-ին, ձերբակալվել, ապա կալանավորվել են ՀՀ Սյունիքի մարզի Կապան քաղաքի բնակիչներ՝ Գարեն Աթաջանյանը, Հենրիկ Ավագյանը եւ Գորիս քաղաքի բնակիչներ՝ Վիտալի Մինասյանը եւ Արա Բուդաղյանը:
