Հայաստանի կառավարությունը կշարունակի Սիրիայի եւ Իրաքի հայերի ինտեգրմանն ուղղված ծրագրերը: Այս մասին հոկտեմբերի 20-ին Ազգային ժողովում նոր Կառավարության ծրագիրը ներկայացնելիս հայտարարեց վարչապետ Կարեն Կարապետյանը:
Նրա խոսքով, կառավարությունը նախատեսում է իրականացնել սիրիահայերի եւ իրաքահայերի ինտեգրմանն ուղղված ծրագրեր, ինչպես նաեւ համահայկական կառույցների հետ համատեղ մշակել հայապահպան ծրագրեր։
Վարչապետը նշել է, որ պետություն-մասնավոր համագործակցության ոլորտում առանձնահատուկ է սփյուռքի ներուժի օգտագործումը. «Բազմաթիվ ոլորտներում սփյուռքի մեր հայրենակիցներն ունեն հարուստ փորձառություն եւ գիտելիքներ, որոնց փոխշահավետ ներդրումը կարող է ստեղծել հասարակական նոր որակներ, առաջ բերել նոր գաղափարներ, ներմուծել մշակութային նոր ձեւաչափեր, բերել նոր աշխատանքային մշակույթ, ստեղծել գլոբալ մրցունակ ապրանքներ եւ ծառայություններ: Կառավարությունը կնախաձեռնի սփյուռքի գործարար ներուժը ներգրավող միջոցառումներ եւ նախագծեր: Կարեւոր է նաեւ մեր սփյուռքի հայրենակիցներին «մեկ պատուհանի» սկզբունքով խորհրդատվական ծառայությունների մատուցումը»,-ընդգծել է Կարեն Կարապետյանը:
