ՀԱԿ-ի արտաքին կապերի պատասխանատու Վլադիմիր Կարապետյանը չի կիսում կարծիքն այն մասին, որ Ռուսաստանն անսպասելիորեն սկսել է զինել ղարաբաղյան հակամարտության կողմերին:
«Մեդիա կենտրոնում» կայացած հանդիպման ժամանակ Կարապետյանը նշել է, որ իրականում սպառազինությունները մատակարարվում են ծրագրին համապատասխան: «Ապրիլյան իրադարձություններից հետո ուժերի հավասարակշռությունը կտրուկ չի փոխվել»,- փաստել է նա: Վլադիմիր Կարապետյանը նաեւ չի կիսում տեսակետը Ռուսաստանի «միակողմանի» մոտեցումների եւ այն մասին, որ Մոսկվան, իբր, նախընտրում է ադրբեջանա-թուրքական տանդեմը:
Միաժամանակ, ըստ նրա, Ադրբեջանի նախագահ Իլհամ Ալիեւի վերջին հայտարարությունը՝ ԵՏՄ-ին անդամակցությունը չբացառելու մասին, անհանգստություն է առաջացնում: Նրա խոսքով՝ այս հարցը նախկինում նույնպես կար, բայց նման հայտարարությունը ստիպում է մտորել, թե ո՞րն է լինելու դրա գինը:
«Ադրբեջանի համար ԵՏՄ-ին անդամակցությունը լավագույն քայլը չէ, բայց Ալիեւը բարձրաձայն խոսում է այդ մասին, հարկավոր է լրջորեն մտածել, թե ինչ պարգեւ է ստանալու»,- ընդգծել է Վլադիմիր Կարապետյանը:
