Այժմ հայկական դեղորայքն ազատ կվաճառվի Ռուսաստանի դեղատներում: Այս մասին հոկտեմբերի 20-ին՝ ԱԺ-ում լրագրողներին ասաց փոխվարչապետ, միջազգային տնտեսական ինտեգրման եւ բարեփոխումների նախարար Վաչե Գաբրիելյանը՝ պատասխանելով NEWS.am-ի հարցին:
Նրա խոսքով՝ միասնական շուկան արդեն կայացած է, նշանակում է՝ Հայաստանում գրանցված դեղորայքը կարող է ազատ վաճառվել Ռուսաստանում, Ղազախստանում, Բելառուսում եւ Ղրղզստանում: Այդ երկրներում կրկնակի գրանցում կատարելու անհրաժեշտություն այլեւս չի լինի: Միակ ճյուղը, որն առայժմ չի ազատականացվել՝ պետգնումներն են, որտեղ պահպանվում է ավելի էժան գնի պահանջը՝ փոխադարձ փոխարինելի դեղորայքը հաշվի առնելով: «Եթե աս ճյուղն էլ ազատականացնենք, ապա խոշոր դեղագործական ընկերությունները շուկայում այլ ազդեցություն ձեռք կբերեն»,- պարզաբանեց Գաբրիելյանը:
Նշենք, որ հոկտեմբերի 20-ին կառավարության նիստում հավանության է արժանացել ԵՏՄ երկրներում դեղորայքի շրջանառության միասնական սկզբունքներ եւ մոտեցումներ սահմանելու մասին համաձայնագրին միանալու արձանագրությունը: