Հայ-ամերիկյան SoloLearn ստարտափը $1.2 մլն սաղմնային ներդրում է ստացել Learn Capital վենչուրային հիմնադրամից: Այս մասին նշվում է ընկերության հայտարարության մեջ:
SoloLearn ծրագրավորում սովորեցնող ամենամեծ հարթակն այս ներդրումը ստացել է «բջջային հավելվածի ժողովրդականությանը բարձրացնելու համար»:
Սիլիկոնյան հովտում գործող Valley VC Learn Capital վենչուրային հիմնադրամը հիմնականում ֆինանսավորում է տրամադրում լավագույն եւ ամենախելացի ուսուցման համար լուծումներ առաջարկող ստարտափներին:
SoloLearn-ի համահիմնադիր Եվա Հյուսյանի խոսքերով ծրագրավորում իմանալը օր օրի անհրաժեշտություն է դառնում, եւ հարթակի ստեղծողները նպատակ ունեն ծրագրավորման ուսուցումը դարձնել ինտերակտիվ եւ էլ ավելի լայն մասսաների հասանելի դարձնել: SoloLearn-ը ոչ թե hard-core (փորձառու) ծրագրավորողների, այլեւ սկսնակների համար է ստեղծված: Հարթակն, ըստ էության, ծրագրավորման ուսուցումը վերածում է փուլային հետաքրքիր խաղի: Հաղթահարելով յուրաքանչյուր փուլը՝ սովորողը ինտերակտիվ դասերի, կոդավորման խնդիրների միջոցով հնարավորություն է ստանում ուսուցման պրոցեսը դարձնել ոչ միայն օգտակար, այլեւ զվարճալի:
«Հետաքրքրական է այն փաստը, որ վերջերս հարթակից սկսել են օգտվել նաեւ մեծ թվով փախստականներ, որոնք ցանկանում են ծրագրավորում սովորել»,- հավելում է Եվա Հյուսյանը:
Ստարտափն այս պահին ունի 11 մլն օգտատեր, իսկ հարթակում օրական 1 մլն կոդավորման գործողություն է կատարվում:
Հավելվածի վեբ տարբերակի հետ մեկտեղ գործում են նաեւ iOS, Android եւ Windows Mobile տարբերակները:
Հիշեցնենք, որ 2015 թվականին SoloLearn-ը ներառվել էր մինչեւ $10 մլն ներդրում ստացած Սիլիկոնյան հովտի լավագույն 10 ստարտափների ցանկում: