ԱՄՆ-ում ապրող Facebook-ի օգտատերերը արդեն կարող են սոցցանցի միջոցով սնունդ պատվիրել: Սոց.ցանցում ավելացվել է ռեստորաններից եւ սրճարաններից սնունդ պատվիրելու ֆունկցիա: Այս մասին տեղեկացնում է ընկերության բլոգը:
Մուտք գործելով նախընտրած հաստատության ֆեյսբուէյան էջ՝ օգտատերերը կարող են սնունդ պատվիրել՝ սեղմելով «Պատվիրել» (Start Order) կոճակը: Այս նախագծում մասնակցում են Delivery.com կամ Slice առաքման ծառայություններում գրանցված ռեստորանները:
Կազմակերպությունների ֆեյսբուքյան էջերի միջոցով օգտատերերը կարող են նաեւ գեղեցկության սրահում տեղ ամրագրել, կինոսրահի կամ այլ իրադարձության տոմսեր պատվիրել:
Այլ երկրներում այս ֆունկցիան կիրառելու մասին ինֆորմացիա Facebook-ը դեռ չի տրամադրում: Ընկերությունից միայն նշում են, որ սա «առաջին քայլն է» եւ խոստանում, որ առաջիկայում կներկայացնեն այլ ծառայություններ, որոնք կօգնեն «օգտատերերին արագ կողմնորոշվել եւ ուղիղ կապ հաստատել տարբեր կազմակերպությունների հետ»:
Հիշեցնենք նաեւ, որ 2016 թվականի հոկտեմբերին Facebook-ը մեկնարկել է Marketplace հարթակը, որի միջոցով կարելի է ապրանքներ գնել եւ վաճառել: Ծառայությունը հասանելի է ԱՄՆ-ի, Մեծ Բրիտանիայի , Ավստրալիայի եւ Նոր Զելանդիայի օգտատերերի համար: