46․7, 37․3 ու 9․9 մմ՝ այս չափերն է ունենալու Vphone S8 նոր սմարթֆոնը, որի թողարկումը գովազդել են Չինաստանում։ Գաջետը իր չափերով շատ քիչ է գերազանցելու Apple Watch սմարթ ժամացույցը, բայց զգալիորեն թեթեւ է լինելու "խնձորային" գաջետից՝ ընդամենը 30 գրամ է կշռելու։ Արտադրողը պնդում է, որ այն լինելու է աշխարհի ամենափոքր սմարթֆոնը, հայտնում է Vesti–ն։
Vphone S8 –ն ունենալու է գունավոր սենսորային էկրան՝ 1․54 դյույմ տրամագծով, 64 ՄԲ օպերատիվ ու 128 ՄԲ ներկառուցված հիշողություն։
Ըստ էության այս գաջետը հենց սմարթ ժամացույց է, պարզապես զանգելու հնարավորություն էլ ունի։ Հաշվի առնելով դրա չափերը՝ զանգելը հարմար կլինի գարնիտուրի օգնությամբ։ Գաջետը, որն ունի FM ռադիոընդունիչ, սրտի ռիթմն ու քայլերի քանակը չափելու սարք, հաստատ պետք կլինի հաճախ լիցքավորել մարտկոցի թույլ պարամետրերի պատճառով։
Սմարթֆոնի օպերացիոն համակարգը նշված չէ, սակայն էկրանային համակարգային կոճակները նույն տեսքն ունեն, ինչ Android–ի վերջին տարբերաները։ Սարքի գինը նույնպես չի նշվում։