Այս պահի դրությամբ մենք ունենք բավարար կարգավորումներ արտաբյուջետային միջոցների վերաբերյալ, սակայն Լեւոն Տեր - Պետրոսյանի առաջարկություն է արել, որը ենթակա է քննարկման: Այս մասին այսօր` հոկտեմբերի 20-ին, խորհրդարանում լրագրողների հետ զրույցում ասաց ՀՀ արդարադատության նախարար Արփինե Հովհաննիսյանը` անդրադառնալով առաջին նախագահի առաջարկին, թե նախարարությունները պետք է հրաժարվեն արտաբյուջեներից:
«Որպես իրավաբան առավել կարեւորում եմ այն հանգամանքը, թե ինչպես են այդ արտաբյուջետային միջոցները ծախսվում, ծախսման թափանցիկությունն ինչ աստիճանի վրա է եւ արդյոք այդ միջոցների ծախսման վրա տարածվում են «Պետական գնումների մասին» ՀՀ օրենքի ընթացակարգերը, այսինքն նախատեսված գումարի ծախսումը չպետք է լինի հայեցողական, կամայական, քաղաքացիների համար ոչ տեսանելի: Իմ կարծիքով, մենք ունենք բավարար չափով կարգավորումներ, սակայն սա առաջարկ է, որը ենթակա է քննարկման, որի արդյունքներով էլ կլինի որոշակի վերաբերմունք կամ որոշում»,- ասաց նախարարը:
Հիշեցնենք, որ Լեւոն Տեր - Պետրոսյանն այդ առաջարկն արել էր մի քանի օր առաջ: Մի քանի նախարարներ արդեն հայտարարել են` պատրաստ չեն հրաժարվել արտաբյուջետային միջոցներից: