Tesla-ն մտադիր է արգելել վարորդներին իր ինքնակառավարվող մեքենաները օգտագործել համատեղ երթեւեկության ծառայություններում: Ընկերությունը ներկայացրել է նմանատիպ սեփական Tesla Network անվանումով նախագիծը, գրում է Electrek պարբերականը:
Հոկտեմբերի 19-ին ներկայացնելով ամբողջությամբ ինքնակառավարվող համակարգը՝ ընկերությունը ներկայացրել է նաեւ Telsa Network-ը: Ենթադրվում է, որ ծառայությունը կաշխատի Uber-ի պես՝ թույլ տալով մեքենաների տերերին օգտագործել մեքենաները ուղեւորներ տեղափոխելու եւ գումար աշխատելու համար:
Սակայն Tesla-ի մեքենաները կթույլատրվի օգտագործել միայն Tesla Network-ի շրջանակում: «Մենք ողջունում ենք Tesla մեքենաների օգտագործումը համատեղ երթեւեկության համար, սակայն եկամուտ ձեռքբերելու համար դրանք կարելի է օգտագործել միայն Tesla Network-ի շրջանակում»,- ասվում է ընկերության հայտարարության մեջ:
Ներկայացնելով ինքնակառավարման նոր համակարգը՝ Էլոն Մասկը հայտարարել է, որ շատ շուտով Tesla մեքենաները առանց վարորդի մասնակցության կկարողանան ինքնուրույն մեծ տարածություններ հաղթահարել: Electrek-ը նշում է, որ Tesla մեքենաների տերերը շուտով կկարողանան իրենց մեքենաները ուղարկել գումար վաստակելու՝ մինչ իրենք զբաղված են այլ գործերով:
Պարբերականը նշում է նաեւ, որ առայժմ Tesla-ն չի սահմանափակում իր մեքենաների տերերին, այդ թվում չի արգելում օգտագործել դրանք Uber կամ Lyft ծառայություններում: Դա պայմանավորված է նրանով, որ դեռ մեքենաների կառավարումը իրականացվում է վարորդի կողմից, այլ ոչ ինքնակառավարման համակարգի:
2016 թվականի սեպտեմբերից Uber-ը փորձարկում է իր ինքնակառավարվող տաքսիները Փիթսբուրգ քաղաքում, բայց այդ մեքենաներում կա վարորդ, որը հսկում է իրավիճակը: Օգոստոսից նաեւ Սինգապուրում երթեւեկում են ինքնակառավարվող մեքենաներ, որոնք թողարկել է տեղական nuTonomy ընկերությունը՝ մեկ ամսով առաջ անցնելով Uber-ից: