ԱՄՆ նախագահի թեկնածուներ Հիլարի Քլինթոնն ու Դոնալդ Թրամփը Ալֆրեդ Սմիթի հիմնադրամի կազմակերպած հեղինակավոր գալա ընթրիքի ժամանակ «խայթոցներ» են փոխանակել միմյանց հասցեին։ ԱՄՆ նախագահի հիմնական թեկնածուները 1960-ական թվականներից սկսած՝ ավանդաբար այցելում են ընթրիքին, որտեղ ծաղրում են միմյանց։
«Այսօր Հիլարիի կյանքում առաջին օրն է, երբ նա խոշորագույն ընկերությունների ղեկավարների հետ նույն սենյակում է գտնվում, եւ դրա համար նրան չեն վճարում»,– կատակել է Թրամփը՝ ակնարկելով խոշոր ընկերությունների հետ Քլինթոնի կապերը։
Կատակն շարժել է նաեւ Քլինթոնի ժպիտը, փոխանցում է BBC–ն։
Քլինթոնը կատակել է իր մասին՝ ասելով, թե ստիպված է եղել ընդհատել քնի համար իր կանոնավոր ընդմիջումները, որպեսզի ներկայանա ընթրիքին։
Ընտրարշավի ժամանակ Քլինթոնի առողջական վիճակի մասին տարբեր շշուկներ էին պտտվում, հատկապես, երբ նա իրեն վատ էր զգացել 2001–ի սեպտեմբերի 11-ի ահաբեկչության զոհերի հիշատակին նվիրված արարողության ժամանակ։
