Լոռու մարզի Չկալով համայնքի սկզբնամասում գտնվող Շաքարյանների երկհարկանի տան պատշգամբը սողանքի հետեւանքով փլվել է:
«Այդ հատվածում սողանք կար, հիմա եկած վերջին ձյան հետեւանքով ավելի է բացվել, ինչի արդյունքում պատշգամբը փլվել է»,- NEWS.am-ի թղթակցի հետ զրույցում նշեց համայնքապետ Ռոման Շաքարյան: Վերջինիս խոսքով մեծ ճեղքեր են առաջացել նաեւ տան պատերի հատվածում եւ ամեն պահի կարող է փլվել նաեւ տունը:
6-հոգանոց բազմանդամ ընտանիքը հայտնվել է անելանելի վիճակում: Ներկայումս անհնար է դարձել ոչ միայն դուրս ու ներս անելը, այլեւ փլման վտանգի տակ գտնվող տանն ապրելը: Փորձում ենք այդ ընտանիքի համար բնակվելու այլ վայր ընտրել, հանել տնից, որ հանկարծ դժբախտ պատահարի զոհ չդառնան: Այդ տանն արդեն շատ վտանգավոր է ապրելը»,- նշում է համայնքապետը:
Գյուղապետի խոսքով, գյուղի այդ հատվածում սողանք վաղուց էին նկատել, սակայն չեն պատկերացրել, որ այն կարող է մեծանալ ու նման չափերի հասնել: