Բարեփոխումների գործընթացը պայմանավորված է կառավարության նախաձեռնության ու ոչ ստանդարտ քայլերով։ Այսօր՝ հոկտեմբերի 21-ին, այս մասին Ազգային ժողովում լրագրողների հետ զրույցում հայտարարել է ԱԺ տնտեսական հարցերի մշտական հանձնաժողովի ղեկավար Վարդան Այվազյանն՝ անդրադառնալով կառավարության ծրագրին։
Ինչ վերաբերում է նախկին կառավարությունների չիրականացած խոստումների պատասխանատվությանը, պատգամավորն ասել է․ «Ինչ վերաբերում է պատասխանատվությանն ասում եմ՝ քաղաքական պատասխանատվությունը սահմանված է օրենքներով։ Եթե կան խախտումներ, որի պարագայում հստակ արձանագրվում է, պետք է կոնկրետ անձը պատասխան տա։ Ով որ պետական բյուջեից մի կոպեկ տարել է, պետք է նրան վռնդել ու փողը վերադարձնել պետական բյուջե»,-ասել է ՀՀԿ-ական պատգամավորը։
Վարդան Այվազյանն ասել է, որ ամեն մեկն իր տեղում կարող է դրա դեմ պայքարել։
«Պաշտոնյաները հարստանում հեռանում են։ Ես տեսնում եմ արատավոր երեւույթները դուք էլ մատնանշում եք, թե մենք մասնակից ենք, ասում եմ՝ եկեք ամբողջապես նայենք՝ ով ինչ տարել է, հետ վերցնենք, բայց պիտի հիմք ունենաս դրա համար: Իսկ եթե հիմնվում ես կարծիքների վրա, այլ իրավիճակ ես ունենում։ Ամեն մարդն ունի անմեղության կանխավարկած։ Պետք է ամեն ինչ իրականացնես օրենսդրական մեխանիզմների պահպանմամբ։ Կամայականությանը ես դեմ եմ որպես անձնավորություն»,-ասել է պատգամավորը։