Աշոտ Միքայելյանը 4 տարեկան է: Նա երկրի զինված ուժերի գերագույն գլխավոր հրամանատարին ասաց, որ ուզում է զինվոր դառնալ, երբ մեծանա: ՀՀ նախագահ Սերժ Սարգսյանն Աշոտին իր մոտ էր կանչել Արմպրոդէքսպո 2016 ցուցահանդեսի բացումից հետո` այցելելով նաեւ Հայաստանի ՓՄՁ զարգացման ազգային կենտրոնի տաղավար:
Աշոտը հայրիկի` Արմանի հետ Հայաստանի ՓՄՁ զարգացման ազգային կենտրոնի տաղավարում ներկայացնում է Միքայելյանների ընտանեկան բիզնեսը` գինիների մեջ հնեցված պանիրները:
«Երևան էքսպո» կենտրոնում բացված ցուցահանդեսում ՀՀ նախագահ Սերժ Սարգսյանը
այցելեց նաև ՓՄՁ ԶԱԿ-ի տաղավար, որտեղ ներկայացված էին «3 սերունդ» նախաձեռնության անդամ արտադրողները: Նախաձեռնությունն իրականություն է դարձել Հայաստանի ՓՄՁ ԶԱԿ-ի և Ի-Վի Քոնսալթինգ խորհրդատվական ընկերության ջանքերով՝ ԱՄՆ ՄԶԳ ֆինանսավորմամբ Հայաստանի ՓՄՁ ԶԱԿ-ի և նրա գործընկեր կազմակերպությունների կողմից իրականացվող «Գործընկերություն` հանուն գյուղական համայնքների բարգավաճման» (USAID/PRP) ծրագրի շրջանակում:
Նախագահ Սարգսյանը զրուցեց ՓՄՁ ԶԱԿ-ի տաղավարում ներկայացված բոլոր 7 արտադրողների հետ, հետաքրքրվեց նրանց արտադրական պոտենցիալով եւ արտահանման հնարավորություններով: Երկրի ղեկավարը տպավորված էր արտադրողների բազմազանությամբ եւ զարգանալու նրանց մղումով:
Հայաստանի ՓՄՁ ԶԱԿ-ի տաղավարում ներկայացված ընկերությունները ներկայացնում էին Գավառի գաթայի, մեղրամոմից պատրաստված մոմերի, Տավուշի սահմանամերձ բնակավայրերի եւ հաշմանդամների պատրաստած ձեռագործ հուշանվերների, խոտաբույսերով թեյերի, չրերի եւ պանիրների արտադրության ոլորտները: