Վերջին հինգ տարիներին Հայաստանում փոքր բիզնեսի համար առաջին անհրաժեշտության շուկաներն ավելի հասանելի են դարձել։ Այս մասին ասվում է Հայաստանի տնտեսական մրցակցության պաշտպանության հարցերով պետական հանձնաժողովի հետազոտության մեջ։
Օրինակ, եթե 2011-ին կարագ ներմուծող 3 խոշոր տնտեսվարողները զբաղեցնում էին շուկայի ընդհանուր կառուցվածքի 91 տոկոսը, այսօր արդեն այդ ընկերությունների ընդհանուր մասնաբաժինը նվազել է մինչեւ 75 տոկոս: Կարագ ներմուծող ընկերությունների թիվը հասել է շուրջ 30-ի: Ձեթի շուկայում խտացումն ավելի նկատելիորեն է նվազել՝ 74 տոկոսից մինչեւ 49 տոկոս, մսամթերքինը՝ 73-ից մինչեւ 62 տոկոս, մանկական սննդինը՝ 53-ից մինչեւ 29 տոկոս, մարգարինինը՝ 55-ից՝ 33 տոկոս։
Դրա արդյունքում 2016-ին Հայաստանը Համաշխարհային տնտեսական ֆորումի Գլոբալ մրցունակության (Global Competitiveness Report) զեկույցում վերջին 10 տարվա կտրվածքով զգալի առաջընթաց է գրանցել շուկաների խտացման (մոնոպոլիաների ու օլիգոպոլիաների ձեռքերում) ցուցանիշի գնահատականով ։
Երկրի վարկանիշը այդ ցուցանիշով միանգամից 28 կետով բարելավվել է՝ հասնելով 51-րդ տեղին, որը ամենաբարձրն է ԱՊՀ-ում։ Համեմատության համար ասենք, որ Ռուսաստանը 59-րդ տեղն է զբաղեցրել, Ղազախստանը՝ 69-րդ, Վրաստանը՝ 76-րդ, Ուկրաինան՝ 99-րդ, Մոլդովան՝ 127-րդ։