Լոռու մարզի Չկալով համայնքում բնակվող Շաքարյանները պետք է անհապաղ լքեն սողանքավտանգ գոտում գտնվող տունը, քանի որ այն ենթակա է փլուզման: Այս մասին NEWS.am-ի հետ զրույցւոմ ասել է Լոռու մարզի փրկարարական վարչության պետ Հրաչիկ Անտոնյանը: Այսօր Չկալով մեկնած փրկարարները խիստ վտանգավոր են համարել այդ տանը բնակվելը:
Վերջին օրերին տեղացած թաց ձյունն ու օրեր առաջ գրանցված երկրաշարժն իրենցն են արել: Այսօր արդեն համայնքի ղեկավարի ու Լոռու մարզի փրկարարական վարչության պետ Հրաչիկ Անտոնյանի ներկայությամբ տանտերը՝ Գարիկ Շաքարյանը ստիպված եղավ գրավոր հավաստիացնել, որ տան վտանգավորության մասին զգուշացված է ու խոստանալ՝ տունն անհապաղ ազատել:
«Մենք տանտիրոջը զգուշացրել ենք, որ այս տունը վտանգավոր է եւ այն անհրաժեշտ է լքել: Պետք է բնակության վայրի հարցը լուծել եւ հեռանալ այս տնից»,-ասաց Հրաչիկ Անտոնյանը:
Տան վտանգավորության հետ կապված խնդրին սեյսմիկ ծառայությունն ու փրկարարները անդրադարձել էին նաեւ երեք տարի առաջ: Դեռեւս 2012թ.-ին վտանգավոր համարված տանն այսօր արդեն արգելվում է բնակվել՝ ելնելով ընտանիքի 6 անդամների անվտանգությունից:
Փլուզման եզրին գտնվող տան հիմնապատերի վրա առաջացած ճեղքերն օր օրի մեծանում են, դրանց չափերն այժմ հասնում են մինչեւ 25 սմ-ի, տանը հենած հենասյուները շարունակ ընկնում են, պատերի ու տանիքի թեքվելուն էլ բնակվողներն ականատես են լինում ամեն օր: