Հանրապետական կուսակցության գործադիր մարմնի նիստին այսօր՝ հոկտեմբերի 21-ին, հաստատվել է ՀՀԿ-ի՝ նոյեմբերի 26-ին կայանալիք 16-րդ համագումարի օրակարգը: Այս մասին ՀՀԿ ԳՄ նիստից հետո լրագրողների հետ զրույցում ասաց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը՝ նշելով, որ անդրադարձ է կատարվել նաեւ ԱԺ-ում կառավարության ծրագրի հաստատմանը, ՀԱՊԿ երեւանյան գագաթաժողվի արդյունքներին: Նոյեմբերի 26-ին կայանալիք համագումարի օրակարագը հետեւյալն է՝ ՀՀԿ-ի վերստուգիչ հանձնաժողովի հաշվետվություն, ՀՀԿ նախագահի հաշվետվություն, ՀՀԿ-ի ծրագրում եւ կանոնադրությունում փոփոխություններ եւ լրացումներ կատարելու մասին նախագծի ընդունում, ՀՀԿ նախագահի ընտրություն, ՀՀԿ ԳՄ անդամների ընտրություն, ՀՀԿ վերստուգիչ հանձնաժողի անդամների ընտրություն, ՀՀԿ 16-րդ համագումարի բանաձեւի ընդունում:
Էդուարդ Շարմազանովը նշեց, որ ՀՀԿ նախագահի այլ թեկնածուներ այս պահին չկան եւ չի էլ կարծում, որ կլինեն. «Ես չեմ կարծում, որ կլինեն այլ թեկնածուներ: ՀՀԿ նախագահը Սերժ Սարգսյանն է եւ կարծում եմ՝ մեր կուսակցության առաջնորդը կլինի պարոն Սարգսյանը»: