Եվրահանձնաժողովի եւ Ավստրիայի զարգացման գործակալության աջակցությամբ օրգանական արտադրությանն անցում կատարելու օգնություն կստանան Հայաստանի եւս 30-40 փոքր ընկերություններ եւ գյուղացիներ: Այս մասին NEWS.am-ի հետ զրույցում ասաց գյուղատնտեսության փոխնախարար Արմեն Հարությունյանը:

Ծրագրի համար ընդհանուր կտրամադրվի 3 մլն եվրո դրամաշնորհ (2,8 մլն Եվրահանձնաժողովից եւ 0,5 մլն՝ Ավստրիայի զարգացման գործակալությունից): Ծրագրի կառավարման խորհրդի մեջ են մտնում այդ կառույցների եւ գյուղնախարարության ներկայացուցիչները:

Ծրագիրն աջակցելու է օրգանական արտադրանքի փոքր եւ միջին արտադրողներին: Մյուս երկու բաղկացուցիչներն են օրգանական արտադրանքի մասին հանրության տեղեկացվածության բարձրացումը եւ միջազգային շուկաներում հայ արըադրողներին աջակցությունը:

Արտադրողներն աջակցությունը կստանան տեխնիկայի եւ անհրաժեշտ նյութերի տրամադրմամբ: Դրանց օգնությամբ նրանք կկարողանան պատրաստել իրենց հողը եւ արտադրությունը, որպեսզի հետո դիմեն օրգանական արտադրանքի հավաստագիր ստանալու համար: Աջակցելու նպատակով արդեն 18 միջին ընկերություններ են ընտրվել: Նրանցից յուրաքանչյուրը 100 հազար եվրոյի տեխնիկական աջակցություն կստանա:

Նրանց թվում են մեղվաբուծական տնտեսությունը, ձիթապտղի յուղի ճմլարանը, գինեգործական տնտեսությունը: «Այսինքն՝ մենք տարբեր ճյուղերից եւ տարբեր շրջաններից ենք հայտեր ստացել, ինչը մեզ համար շատ կարեւոր է»,- հավելեց Հարությունյանը:

Հաջորդ փուլում օգնություն կստանան 30-40 ոչ մեծ ընկերություններ՝ մինչեւ 10 հազար եվրոյի չափով: