Այնքան վատ է տնտեսության վիճակը, որ էլ վատանալու տեղ չկա: Այս մասին NEWS.am-ի հետ զրույցում ասաց ՀՀԿ խմբակցության պատգամավոր, ՄԱՊ գործարանի սեփականատեր Ալիկ Պետրոսյանն` անդրադառնալով կառավարության ծրագրի իրագործման հավանականությանը:
«Սրանից էն կողմ գնալու տեղ չկա, պիտի ամեն ինչ արվի, որ լավ լինի: Միայն էն գաղափարը, որ սրանից հետո էլ չի կարող այսպես շարունակվել` անկում, հա անկում, հույս է ներշնչում, որ պիտի քայլեր արվեն: Այսինքն, էլ վատանալու տեղ չկա, էդքան վատ է վիճակը, դրա համար ես ճանաչում եմ Կարեն Կարապետյանին եւ ես 100 տոկոս համոզված եմ, որ ոչ մի ավելորդ խոստում չի անի»,-ասաց պատգամավորը:
Դիտարկմանը` երկրի տնտեսությունն իր նշած վատթարագույն վիճակին հասցրել է իշխող Հանրապետական կուսակցությունը, ի՞նչի վրա հիմնվելով է այդչափ վստահ, որ այս խոստումները չեն արժանանա նախկիննների ճակատագրին, պատգամավորն արձագանքեց. «Բոլոր դեպքերում հիմա փոփոխություն իրականացնող գործիքների էությունը կայանում է նրանում, թե մարդը հարցին ինչ տեսանկյունից է նայում: Կարող է տասը ուղղություն լինի նույն հարցի լուծման համար… հիմա եթե նախկին կառավարություններին չի հաջողվել այդ հանձնարարած գործիքներով կառավարության առջեւ դրված խնդիրները լուծել, այս կառավարաությունից պահանջել, որ բոլոր խնդիրներին լուծում տա, սուտ կլինի: Մեր երկրի տնտեսական վիճակը չի կարող թույլ տալ, որ բոլոր խնդիրները լուծվեն, բայց որ կամաց-կամաց դրական շարժեր տեսնելու ենք, ես հավատում եմ»:
