Մոսկվայում չկան այնպիսի միամիտ մարդիկ, որոնք կարող են Ադրբեջանի հավակնությունների պատճառով խաղասեղանին դնել տարածաշրջանում Ռուսաստանի հեղինակությունն ու շահերը: Այս մասին NEWS.am-ի հետ զրույցում ասել է ռուսաստանցի քաղաքագետ Ալեքսանդր Սկակովը:
Անդրադառնալով Ադրբեջանի նախագահ Իլհամ Ալիեւի հայտարարություններին, թե իր երկիրը կարող է անդամակցել ԵՏՄ-ին, քաղաքագետը նշեց, որ դա շատ ավանդական, հերթական եւ ոչինչ չպարտադրող հայտարարություն էր: «Ինչ վերաբերում է մոտիվացիային, անխոս, խոսքը քաղաքականության մասին է, եւ այդ մոտիվացիայի էությունն է հասնել նրան, որ Մոսկվան պաշտպանի Ադրբեջանի հավակնությունները ղարաբաղյան հակամարտությունում: Սակայն դա անհնար է, քանի որ Մոսկվայում չկան այնպիսի միամիտ մարդիկ, որոնք կարող են խաղասեղանին դնել տարածաշրջանում Ռուսաստանի շահերը»,- ասել է քաղաքագետը:
Հիշեցնենք, որ «ՌԻԱ Նովոստի»-ի հետ զրույցում Ալիեւը հայտարարել էր, թե չի կարելի բացառել ԵՏՄ-ին Ադրբեջանի անդամակցությունը, սակայն երկիրն իրեն դեռ վստահ է զգում ներկայիս կարգավիճակում:
