Խոշոր բանկերը պատրաստվում են 2017-ի սկզբին հեռանալ Մեծ Բրիտանիայից, երբ ուժի մեջ կմտնի Brexit-ը։ Այս մասին Observer-ում գրել է Բանկիրների բրիտանական ասոցիացիայի (BBA) նախագահ Էնթոնի Բրաունը։
«Բանկերի համար Brexit-ը նշանակում է ոչ միայն առեւտրի վրա լրացուցիչ սակագների կիրառում, ինչը, հնարավոր է, տեղի ունենա նաեւ այլ ոլորտներում։ Դա վերաբերում է նրան, արդյոք բանկերը ծառայություններ մատուցելու իրավական իրավունք կունենան, թե ոչ»,-հայտարարել է Բրաունը։
«Ինչ վերաբերում է բիզնեսներին, ապա նրանք չեն կարող սպասել մինչեւ վերջին րոպեն։ Բանկերը կարող են լավատեսություն ունենալ, բայց ստիպված են աչքի տակ ունենալ նաեւ վատագույն սցենարները։ Միջազգային բանկերի մեծամասնությունում նախագծային խմբերը որոշում են, թե ինչ քայլեր պետք է ձեռնարկել՝ երաշխավորելու համար իրենց հաճախորդների սպասարկման հնարավորությունը եւ մինչեւ որ ամսաթիվն է դա հնարավոր»,-հավելել է նա։
Այդուհանդերձ, Բրաունը կարծիք է հայտնել, որ Լոնդոնը, լինելով գլոբալ ֆինանսական կենտրոն, կկարողանա դիմակայել դժվարություններին։
Ավելի վաղ Մեծ Բրիտանիայի վարչապետ Թերեզա Մեյը հայտարարել էր, որ իր երկիրը մտադիր է մինչեւ 2017 թվականի մարտը ակտիվացնել ԵՄ կազմից դուրս գալու Լիսաբոնյան պայմանագրի 50-րդ հոդվածը։