Թուրքիայի իշխանությունները շուրջ 4 հազար մարդու են որոնում՝ հուլիսի 15-ին պետական հեղաշրջման փորձին մասնակցելու կասկածանքով։ Այս մասին հաղորդում է Milliyet-ը՝ վկայակոչելով արդարադատության նախարար Բեքիր Բոզդաղին։
«Դեռեւս հետախուզման մեջ է 3 907 մարդ՝ հեղաշրջման փորձին առնչություն ունենալու կասկածանքով։ Այդ գործով 500 հազար էլեկտրոնային կրիչների վրա նյութեր են հավաքվել, որոնք ուսումնասիրելու համար հատուկ ստորաբաժանում է ստեղծվել»,-ասել է նախարարը։
Նրա խոսքով, հուլիսյան իրադարձություններից հետո 82 հազար մարդու նկատմամբ հետաքննչական գործողություններ են իրականացվել, կալանավորվել է մոտ 35 հազար մարդ։
Բոզդաղը քննադատության է ենթարկել ԱՄՆ իշխանություններին, որոնք չեն կատարում Թուրքիայի պահանջը՝ Ֆեթուլլահ Գյուլենին կալանավորելու եւ Անկարային հանձնելու վերաբերյալ։ Պաշտոնական Անկարան Գյուլենին մեղադրում է հեղաշրջման փորձ կազմակերպելու մեջ։
Ավելի վաղ նշվել էր, որ Թուրքիայի արդարադատության նախարարը հոկտեմբերի 26-27-ին կմեկնի ԱՄՆ՝ քննարկելու Գյուլենի արտահանձնման հարցը եւ ամերիկյան կողմին կներկայացնի բոլոր անհրաժեշտ փաստաթղթերը, որոնք հաստատում են Գյուլենի հանցավոր գործունեությունը։