New World Hackers անունով հաքերների խումբն իր վրա է վերցրել Dyn ինտերնետ-ծառայությունների պրովայդերի նկատմամբ կիբերհարձակումների պատասխանատվությունը, ինչը հանգեցրել է այնպիսի խոշորագույն կայքերի աշխատանքի խափանումների, ինչպիսիք են Twitter-ը, Reddit-ը, Spotify-ն եւ այլն։
Հաքերները Associated Press-ին պատմել են, որ կազմակերպել են DDoS հարձակումներ։
«Մենք դա արել ենք, որպեսզի գրավենք ՀԴԲ-ի ուշադրությունը, նաեւ ցույց տանք մեր հզորությունը»,-համացանցի միջոցով կապի ժամանակ գործակալությանն ասել են խմբի անդամները։
Նրանց խոսքով, իրենց խմբի ավելի քան 10 անդամներ մասնակցել են հարձակմանը։ Ներկայումս անհնար է հաստատել հաքերների այդ հայտարարության իրավացիությունը։
Dyn ընկերությունում նշել են, որ իրենք որեւէ հաղորդագրություն չեն ստացել այն մասին, թե ով է պատասխանատու հարձակման համար, սակայն իրավապահների հետ աշխատում են նրանց ինքնությունը բացահայտելու ուղղությամբ։